Улады ЗША прад’явілі абвінавачанні тром удзельнікам штурму будынку Кангрэсу ў Вашынгтоне. Пра гэта паведамляецца на сайце Міністэрства юстыцыі краіны.
Джэйка Анджэлі (таксама вядомага як шаман QAnon) абвінавачваюць у нелегальным ды гвалтоўным пранікненні на закрытую тэрыторыю і ў парушэннях грамадскага парадку.
Аналагічныя прэтэнзіі да Адама Джонсана, які трапіў у аб’ектывы з кафедраю спікеркі Нэнсі Пэлосі ў руках.
Дэрыка Эванса, які таксама гуляў па Капітолію ды вёў жывую трансляцыю гэтага на Facebook, абвінавачваюць яшчэ і ў падбухторванні натоўпу да незаконных дзеянняў.
Натоўп уварваўся ў будынак Кангрэсу 6 студзеня, калі там праходзіла пасяджэнне абедзвюх палатаў амерыканскага парламенту. Яны павінны былі фармальна зацвердзіць перамогу Джо Байдэна на прэзідэнцкіх выбарах. Прыхільнікі дзейнага прэзідэнта краіны Доналда Трампа, не згодныя з вынікамі галасавання, штурмавалі Капітолій, у выніку чаго загінулі пяць чалавек, сярод іх жанчына і паліцыянт.
ІК, belsat.eu