«Дзве дзяржавы – адна эканоміка» – такі прынцып паглыбленай інтэграцыі Расеі і Беларусі, заявіў міністр эканамічнага развіцця Расеі Максім Арэшкін падчас сустрэчы ў Савеце Федэрацыі РФ.
«Пэўная колькасць няўзгодненых пытанняў застаецца. Паступова рухаемся наперад. У пятніцу (20 снежня ў Санкт-Пецярбурзе) адбудзецца чарговая сустрэча двух прэзідэнтаў. Мне здаецца, яшчэ адзін крок наперад мы можам зрабіць», – заявіў Максім Арэшкін.
Спрэчныя пытанні, якія не ўзгаднілі прэм’ер-міністры і кіраўнікі краінаў, датычацца пытанняў ў нафтавай і газавай галіне. Пры гэтым кіраўнік Беларусі Аляксандр Лукашэнка заявіў, што не выключае нават некалькіх раўндаў перамоваў з Расеяй аб «балючых пытаннях».
Да канца году Аляксандр Лукашэнка плануе сустрэцца з прэзідэнтам Расеі Уладзімірам Пуціным і з прэм’ер-міністрам краіны Дзмітрыем Мядзведзевым. Калі сустрэча з кіраўніком РФ адбудзецца 20 снежня ў Санкт-Пецярбурзе, то з прэм’ерам Мядзведзевым у Беларусі, «дзесьці ў пераднавагоднія дні», заявіў Лукашэнка.
7 снежня Пуцін і Лукашэнка пасля перамоваў у Сочы так і не выйшлі да журналістаў з заявамі. З прэсай размаўлялі чыноўнікі і дыпламаты.
На 20 снежня ў Менску запланаваныя пратэсты супраць інтэграцыі з РФ.
СК belsat.eu
