Міністр аховы здароўя Уладзімір Каранік падчас прэс-канферэнцыі 17 красавіка паведаміў, што ў Менску ў 90 працаўнікоў «хуткай дапамогі» выяўлены каронавірус. Большасць з іх – адміністратыўны персанал.
Каранік прызнаў, што сярод захварэлых на каронавірус высокі адсотак медыкаў, бо тыя непасрэдна кантактуюць з інфікаванымі. Міністр распавёў таксама пра сітуацыю ў менскай «хуткай дапамогі»:
«Магу сказаць, што на сённяшні момант мы маем 90 лаборатна-пацверджаных выпадкаў інфікавання. Толькі 23 выпадкі тычацца выязнога складу – гэта тыя працаўнікі, якія працуюць на выездах. Астатнія выпадкі – гэта апарат кіравання, адміністратыўна-гаспадарчы персанал, спадарожныя службы».
Агульную лічбу інфікаваных каронавірусам медыкам Каранік не назваў.
Каранік: сітуацыя ў Віцебску стабілізавалася
Каментуючы ў цэлым сітуацыю ў рэгіёнах, Уладзімір Каранік заявіў, што ў Віцебску сітуацыю з каронавірусам атрымалася ўзяць пад кантроль. «З нашага пункту гледжання сітуацыя там стабілізавалася», – падкрэсліў ён.
Паводле міністра, у апошні тыдзень там назіраецца зніжэнне колькасці пацыентаў з пнеўманіяй.
«У бліжэйшы час колькасць выпісаных будзе значна перавышаць колькасць тых, хто паступіў. Тэмпы паступлення зніжаюцца. Мы лічым, што сітуацыю атрымалася ўзяць пад кантроль», – падкрэсліў ён.
Каранік прызнаў, што ў Докшыцкім раёне колькасць пнеўманіяў вышэй, чым у іншых. Што тычацца пацверджаных выпадкаў COVID-19, то ў Докшыцах зарэгістравана 20 выпадкаў інфікавання. Два пацыента знаходзяцца на апаратах штучнай вентыляцыі лёгкіх.
Каранік таксама распавёў, што на гэтым тыдні тры цяжарныя жанчыны з COVID-19 нарадзілі абсалютна здаровых дзяцей. «І дзеці, і мамы адчуваюць сябе здавальняюча», – падкрэсліў ён. Міністр назваў гэтую падзею «маленькай перамогай».
Мабільныя брыгады ў Менску
Каранік распавёў, што беларускія медыкі атрымалі партатыўныя пульсаксіметры, якія дазваляюць высвятляць насычанасць крыві кіслародам.
«Па горадзе Менску сфармаваныя мабільныя брыгады, якія будуць кантраляваць амбулаторнае лячэнне пацыентаў з ВРВІ. Гэта будзе не проста апытанне, як вы сябе адчуваеце. Гэта будзе нармальная лабараторная дыягностыка, пры неабходнасці з экспрэс-тэстам, з абавязковай пульсаксіметрыяй, каб ацаніць, што насычэнне крыві кіслародам дастатковую», – падкрэсліў міністр.
701 выпадак парушэння самаізаляцыі
Намесніца начальніка аддзелу гігіены, эпідэміялогіі і прафілактыкі Міністэрства аховы здароўя Іна Карабан распавяла, што ў Беларусі фіксуецца даволі шмат выпадкаў парушэння ўмоваў рэжыму самаізаляцыі.
«701 выпадкаў парушэнне мераў самаізаляцыі было выяўлена. Гэта значыць людзей не знайшлі дома ў межах 2-3 гадзінаў (з перыядычнасцю ў адну гадзіну пераправяралі) Такая інфармацыя была накіраваная і ў РУУС, і ў пракуратуру. У дачыненні да 7 асобаў распачаты адміністратыўны працэс, у дачыненні да 2 асобаў працэс ужо праведзены – сума штрафу ў межах 2 базавых велічыняў», – распавяла яна.
Карабан дадала, што максімальная сума штрафу за парушэнне самаізаляцыі – 30 базавых велічыняў (810 рублёў). Таксама грамадзяніна могуць прыцягнуць і да крымінальнай адказнасці, калі парушэнне рэжыму самаізаляцыі прывядзе да заражэнне і цяжкіх наступстваў.
Каранік заклікаў беларусаў не наведваць могілкі на Радаўніцу і нікуды не зʼязджаць падчас вялікіх выходных. Ён адзначыў, што ёсць і іншыя дні, калі можна ўспомніць памерлых і прыбрацца на могілках, «без рызыкі, каб гэтых магілаў стала больш».
«Мы бачым па некаторых рэгіёнах выразную сувязь: спачатку Вербніца каталіцкія, а потым праз 7-11 дзён мы сярод менавіта наведнікаў (цэркваў – заўв. belsat.eu) рэгіструем павелічэнне колькасці інфікаваных», – расказаў міністр.
Будзе дадавацца
ІІ belsat.eu
