Мужчына напаў у нядзелю на вернікаў у святыні ў Маскве. Пра гэта паведамілі ў Міністэрстве ўнутраных справаў Расеі.
У МУС адзначылі, што ранкам 16 лютага 26-гадовы жыхар Ліпецкай вобласці ўвайшоў у царкву на Бакунінскай вуліцы і нажом параніў двух чалавек. Пацярпелых даставілі ў медычныя ўстановы.
Нападніка затрымалі па гарачых слядах. Паліцыянты высвятляюць прычыны і абставіны здарэння.
Як паведамляе ТАСС, мужчына быў у неадэкватным стане. Крыніца выдання адзначыла, што мужчыну затрымалі шэсць вернікаў.
Настаяцель святыні Свяціцеля Мікалая протаіерэй Кірыл Саладкоў заявіў, што абодва мужчыны, якія атрымалі нажавыя раненні пры нападзе, з’яўляюцца панамарамі ў святыні. Паводле яго, ім нічога не пагражае. Нападнік выглядаў як звычайны вернік, пры нападзе нічога не выкрыкваў.
У размове з РЕН ТВ святар заявіў, што нападнік забег у цэнтральны алтар. Ён быў у акулярах, гумовых пальчатках, капюшоне і навушніках, слухаў музыку. Калі да яго падышоў настаяцель з панамаром, мужчына ўдарыў апошняга нажом. Яго паспрабавалі затрымаць, і тады нападнік параніў яшчэ аднаго чалавека.
Телеграм-канал 2ch / Двач піша, што мужчына прыехаў у Маскву на заробкі, а напад здзейсніў таму, што яго «не задавальняе крывадушнасць». Нагодай нібыта стала параўнанне грамадзянскіх жонак з прастытуткамі.
МГ belsat.eu
