Праз сітуацыю з каронавірусам беларускія турыстычныя фірмы вымушаныя скасоўваць туры ў Кітай. Пра гэта іх прадстаўнікі заявілі ў размове з карэспандэнтам «Белсату».
Для турыстычных фірмаў, якія працуюць з кітайскім кірункам і якія, паводле абвестак, з дня на дзень планавалі накіроўваць новыя групы ў КНР, сітуацыя радыкальна змянілася.
«На гэты момант туры не прапануем. Мы іх прыпынілі. Попыт турыстаў не тое, што значна ўпаў, яго проста няма», – заявілі ў студыі турызму «Саната».
Аналагічная сітуацыя ў турыстычнай кампаніі «Кола падарожжаў».
«Зараз ужо няма рэйсаў. Таму не браніруем людзей. Няма нават прапановаў», – адзначылі ў турфірме.
А вось туры ў іншыя азіяцкія краіны, у тым ліку ў суседнія, як напрыклад В’етнам, па-ранейшаму карыстаюцца папулярнасцю ў беларусаў.
У кампаніі «Туртранс», якая не так актыўна працуе з азіяцкім кірункам, заяўляюць, што сёлета ўвогуле не мелі жадаючых наведаць КНР.
А вось менскія рэстараны кітайскай кухні, разнастайныя спа-салоны ды медычныя цэнтры падзення наведвальнасці амаль не заўважылі.
У рэстаране «Шанхай» адзначаюць, што сітуацыя з каронавірусам на наведвальнасць не паўплывала ніяк. Пра адсутнасць уплыву захворвання заяўляюць і ў рэстарацыі «Chinatown» – хоць прызнаюць, што наведнікаў стала трошкі менш. Але звязваюць гэта больш з навагоднімі вакацыямі.
«Наведнікі яшчэ не ўсе вярнуліся, а каронавірус ніяк не паўплываў», – падкрэслілі ў рэстарацыі.
Праўда, з улікам таго, што вакацыі кітайскім студэнтам працягнулі з прычыны каронавірусу, ускосна ўплыў заўважыць можна.
У рэстаране «Янцзы» суразмоўца адзначыла, што колькасць наведнікаў калі і зменшылася, то нязначна. Моцнага падзення наведваемасці тут не заўважылі.
Не назіраюць нейкіх зменаў і ў азіяцкіх спа-салонах у Менску. Гэтак, у «Белым Лотасе», які спецыялізуецца на тайскіх спа-працэдурах заяўляюць, што «агулам нічога не змянілася, усё добра», і падкрэсліваюць, што да Кітаю ніякага дачынення не маюць.
У Менскай абласной клінічнай больніцы, дзе дзейнічае Цэнтр традыцыйнай кітайскай медыцыны, таксама заяўляюць, што каронавірус на працу ўстановы не ўплывае.
«У нас не працуюць людзі з Кітаю. Яны прыязджалі на тры тыдні ў студзені. Зараз працуюць беларусы, якія навучаліся ды праходзілі стажыраванне ў Кітаі летась», – заявілі ў больніцы.
Між тым лагер «Брыганціна» пад Радашковічамі 7 лютага прыняў на рэабілітацыю першую групу кітайскіх студэнтаў, паведаміла «Белсату» прэс-сакратарка Міністэрства аховы здароўя Юлія Барадун. У бліжэйшы час там чакаюць новыя групы навучэнцаў з КНР.
МГ belsat.eu