Прэзідэнт ЗША Доналд Трамп плануе ўвесці іміграцыйныя абмежаванні ў дачыненні да грамадзянаў сямі краін, піша Politico са спасылкай на ўласныя крыніцы.
У спіс краін-кандыдатаў увайшлі Беларусь, Кіргізія, Эрытрэя, М’янма, Нігерыя, Судан і Танзанія. Пералік яшчэ можа быць пашыраны, удакладняе The Wall Street Journal.
Гаворка не ідзе аб поўнай забароне на ўезд у ЗША для ўсіх грамадзянаў гэтых краін. Уезд могуць абмежаваць толькі чыноўнікам ці ўладальнікам пэўных катэгорый віз. Таксама ім могуць забараніць удзел у латарэі грын-карт.
Раней Трамп наагул прапаноўваў латарэю скасаваць.
У кулуарах Сусветнага эканамічнага форуму ў швейцарскім горадзе Давос Доналд Трамп заявіў, што сапраўды плануе пашырыць спіс краінаў з абмежаваннямі на паездкі. Прэзідэнт ЗША не паведаміў, якія менавіта краіны будуць дададзеныя ў гэты «чорны спіс».
Забароны могуць увесці ўжо 27 студзеня.
25 студзеня 2017 года Трамп падпісаў указ аб забароне ўезду ў ЗША грамадзянам некалькіх краін з пераважна мусульманскім насельніцтвам (Іран, Сірыя, Емен, Лівія і інш.). Першапачаткова выкананне ўказа заблакавалі суды, але потым Вярхоўны суд ЗША зацвердзіў рашэнне амерыканскага прэзідэнта.
У МЗС Беларусі адмовіліся каментаваць разгорнута інфармацыю пра магчымыя абмежаванні, паведамляе TUT.by. У знешнепалітычным ведамстве заявілі, што адпаведнага паведамлення яны не атрымлівалі.
***
Упершыню санкцыі ў дачыненні да беларускіх уладаў былі ўведзены ЗША пасля прэзідэнцкіх выбараў у Беларусі ў 2006 годзе. Летась санкцыі были падоўжаныя да 16 чэрвеня 2020 года. У санкцыйным спісе 10 асобаў, у тым ліку Аляксандр і Віктар Лукашэнкі, Лідзія Ярмошына, Віктар Шэйман, Дзмітрый Паўлічэнка ды іншыя былыя і цяперашнія чыноўнікі.
КА,ЮВ belsat.eu