Сусветны банк вылучыць Беларусі экстранае фінансаванне для набыцця прадметаў медычнага прызначэння ў сувязі з распаўсюдам каронавіруса.
«Сусветны банк зробіць усё магчымае, каб дапамагчы Беларусі адрэагаваць на медычныя, сацыяльныя і эканамічныя праблемы звязаныя з распаўсюдам COVID-19. Зараз урад, ААН і Сусветны банк сумесна працуюць над планаваннем, фінансаваннем, а таксама закупкай прадметаў медычнага прызначэння«, – паведамілі агенцтву «Интерфакс-Запад» у беларускім прадстаўніцтве СБ.
Але, адзначылі ў прадстаўніцтве, пакуль Беларусь не звярталася з прапановамі аб рэструктурызацыі наяўнага доўгу.
23 сакавіка першы намеснік прэм’ер-міністра Дзмітрый Крутой заявіў, што Беларусь разглядае магчымасць рэструктурызацыі часткі вонкавага доўгу. Паводле яго, Беларусь паспрабуе «выйсці на партнёраў, не зважаючы на каранцінныя абмежаванні і іншае».
Першы віцэ-прэм’ер нагадаў, што Сусветны банк анансаваў вылучэнне наўпроставай дапамогі, у тым ліку на ліквідацыю наступстваў каронавіруса. І хоць Беларусь пакуль такіх грошай у яго не запытвала, Менск паспрабуе папрацаваць з банкам «у частцы даўгавых лініяў».
Адносна перспектываў супрацы з МВФ, Дзмітрый Крутой нагадаў, што фонд падчас выбарчых кампаніяў не вядзе перамовы пра крэдыты або заключэнне новых краінавых праграмаў. Таму з ім плануецца сустрэцца толькі пасля выбараў.
МГ belsat.eu
