17 студзеня Сямёна Цімашкова прызналі вінаватым у замаху на забойства бацькі, падае «Камсамольская праўда».
Суд Ленінскага раёну Менску прысудзіў 14-гадовага Сямёна Цімашкова да шасці гадоў пазбаўлення волі ў выхаваўчай калоніі. Такі тэрмін напярэдадні прасіў прызначыць абвінавачанаму пракурор.
Дзмітрый Цімашкоў, якога ў верасні 2018 года сын шэсць разоў ударыў нажом у спіну, збіраецца падаваць апеляцыю.
«Я бачыў шмат парушэнняў і ў працэсе суда, і ў працэсе следства. Я думаю, што мы даможамся перагляду гэтай справы, перакваліфікацыі па іншым артыкуле», – заявіў пасля суду Дзмітрый Цімашкоў.
Працэс быў закрытым, журналістаў на яго не пускалі.
Пра справу і суд стала вядома з блогу Цімашкова.
«Шэсць удараў нажом у спіну, тры злева, тры справа, адзін з іх амаль у хрыбет, яшчэ адзін з іх у лёгкае, два з іх літаральна на сантыметр вышэй дыяфрагмы, і гэта шчасце, інакш песня была б яшчэ больш сумнай, і, нарэшце, два ўдары менш значных, таму што прыйшліся ў рэбры. Нож – папулярнай паляўнічай мадэлі «Паўднёвы крыж»», – пісаў Цімашкоў.
Пазней мужчына не раз каментаваў сітуацыю журналістам, распавядаў, што сітуацыю ў сям’і можна было назваць напружанай.
Паводле Дзмітрыя Цімашкова, ён шмат увагі надаваў рэабілітацыі дачкі, у якой цяжкая форма ДЦП, на сына заставалася менш часу, але дачыненні з ім былі нармальныя. Маці Цімашковых жыве асобна.
Прысуд не ўступіў у законную сілу і можа быць абскарджаны.
ДД/Belsat.eu
