Пра гэта расейскі лідар распавёў пасля сустрэчы з амерыканскім прэзідэнтам на саміце Вялікай дваццаткі ў Японіі, падае «Reuters».
Падчас саміту Вялікай дваццаткі ў Осака Уладзімір Пуцін абмеркаваў з Дональдам Трампам пытанні ад гандлю да раззбраення. Ён таксама запрасіў Трампа на цырымонію святкавання 75-годдзя перамогі над нацыстамі ў траўні налета.
Трамп пацвердзіў, што Пуцін запрасіў яго ў Маскву.
«Ён запрасіў мяне, і я сказаў, што сур’ёзна падумаю», – заявіў Трамп пасля саміту.
Пуцін ахарактарызаваў перамовы ў Осака як «добрую сустрэчу, дзелавую, прагматычную» і сказаў, што кіраўнікі дамовіліся, што двухбаковыя сувязі патрабуюць паляпшэння пасля шматгадовых дыпламатычных канфліктаў вакол Украіны і абвінавачванняў ува ўмяшанні Расеі ў амерыканскія выбары.
«Я думаю, мы абодва разумеем, што трэба нейкім чынам вырашыць цяперашнюю сітуацыю. Абедзве краіны павінныя перагарнуць старонку і ісці наперад», – заявіў Пуцін.
На пытанне пра імавернасць увядзення санкцыяў ЗША супраць Расеі Пуцін сказаў, што Вашынгтон сам вырашыць, як найлепш наладзіць адносіны з Масквой.
Апроч абвінавачванняў умяшання ў выбары ў ЗША Пуцін абмеркаваў з Трампам сітуацыю ў Венесуэле, аднак не распавёў падрабязнасці размовы.
ДД belsat.eu