Прэзідэнт Літвы расказала віцэ-прэзідэнту ЗША пра будаўніцтва «атамнай бомбы» у Беларусі
Даля Грыбаўскайтэ падняла пытанне будаўніцтва АЭС у Астраўцы падчас сустрэчы лідараў краінаў Балтыі ў Вільні і заявіла, што Расея можа выкарыстаць беларускую атамную станцыю ў якасці «неканвенцыйнай зброі».
Грыбаўскайце паведаміла прысутнаму на сустрэчы віцэ-прэзідэнту ЗША Майку Пэнсу пра новую расейскую пагрозу – будаўніцтва ў Астравецкім раёне каля мяжы з Літвой атамнай электрастанцыі.
«Рашэнне ЗША аб санкцыях у дачыненні да Расеі, якое закранае і энергетычныя праекты, – жорсткі сігнал, які сведчыць, што спробы Крамля выкарыстоўваць сваё становішча ў энергетычным сектары для маніпуляцыяў і ўмяшання ў палітыку іншых краінаў не будуць ігнаравацца», – цытуе Грыбаўскайце ейная прэс-служба.
Першы энергаблок Беларускай АЭС будзе ўведзены ў эксплуатацыю ў 2019 годзе, другі – у 2020-ым.
БелАЭС будуецца на расейскія крэдытныя сродкі пры ўдзеле расейскіх спецыялістаў.
