Памежны канфлікт і памежны стан

Аляксандр
Фядута
паліткансультант

25 снежня, наведваючы інфекцыйную больніцу, Аляксандр Лукашэнка заявіў: «Мы нядаўна затрымалі групу Аўтуховіча. Мярзотнікі апошнія. Зараз мы іх усе каналы ўскрылі. Яны везлі тонамі зброю праз Украіну. Адтуль дасылаюць нам. Праз Украіну; праз Літву, Польшчу, цяпер вельмі складана – мяжу зачынілі наглуха. І з Украінай цяпер закрылі ўжо, мыш не прапаўзе. Праз Расею часам пранікаюць, у нас мяжы няма. Але ўжо не тое. Мы гэтае пытанне трымаем жорстка на кантролі».

«Мярзотнікаў» пакінем на сумленні таго, хто гаворыць. Але наконт тон зброі…

Маса мадэрнізаванага аўтамата Калашнікава АК-74М складае 4,1 кг – разам са штык-нажом і заражаным магазінам.

Маса пісталета «Берэта-92» складае 0,98 кг.

Маса ППК-20 (пісталет-кулямёт Калашнікава) складае 3,65 кг.

Цяпер прапануем школьніку вырашыць найпростшую задачу: колькі асобнікаў зброі кожнай з мадэляў павінна быць у партыі зброі, калі агульная маса партыі складае 1 000 кг. Не болей.

Зброя, якая паказаная па БТ, прыпісваецца Аўтуховічу. Скрын відэа

Уявілі?

Далей трэба ўявіць сабе, колькі пад гэтую партыю трэба сродкаў транспарціроўкі, каб перавезці яе праз беларуска-ўкраінскую мяжу незаўважанай. Якім павінен быць памер хабару, каб доблесныя беларускія і не менш доблесныя ўкраінскія памежнікі і мытнікі пагадзіліся прапусціць столькі агнястрэльнай зброі праз свае прапускныя пункты? Нарэшце, які тэрмін пагражае тым памежнікам і мытнікам, якія гэтую тону прапусцілі?

Я не лічу асобаў, якія ахоўваюць нашу мяжу, свяцейшыя не толькі за Папы рымскага, але нават больш бязгрэшныя за мітрапалітаў Веньяміна і Тадэвуша Кандрусевіча. Думаю, ім ёсць за што баяцца Страшнага суда і не толькі страшнага, але і звычайнага, дзяржаўнага. Не ўсім – некаторым. Але, слухайце, гаворка ідзе пра бяспеку беларускай дзяржавы! А тут як атрымліваецца?!

БТ назвала экс-палітвязня Мікалая Аўтуховіча «верхаводам тэрарыстычнай банды»

19 сакавіка 2017 года праз украінска-беларускую мяжу прарваўся джып з узброенымі людзьмі. Як сцвярджаў інтэрнэт-рэсурс Onliner, які спасылаўся на памежнікаў, «у 1:55, праз 10 хвілін пасля самога прарыву, аператыўная група ДПК непадалёк ад пункта пропуску «Аляксандраўка» ў раёне пасёлка Габрылееўка (Нараўлянскі раён) з ужываннем зброі спыніла аўтамабіль. Былі затрыманыя два грамадзяніна, асобы якіх высвятляюцца. Па наяўнай інфармацыі, у дадзеным аўтамабілі мог знаходзіцца яшчэ адзін невядомы, які ў цяперашні час адшукваецца». «У ходзе вонкавага агляду аўтамабіля знойдзены пісталет маркі ТТ і два заражаных магазіны, а таксама прадмет, знешне падобны на траціл і электрадэтанатары», – дадалі ў Дзяржпагранкамітэце».

Лёс і пісталета, і джыпа, і двух затрыманых засталіся не вядомымі для шырокай публікі. Хоць, вядома, іх варта было б прад’явіць і пакараць, каб іншым непавадна было. Але іх не прадʼявілі на працягу трох з паловай гадоў. Верагодна, разбіраюцца да гэтага часу. А можа, падаўжаюць утрыманне пад вартай, каб потым выпусціць у зале суда па заканчэнні тэрміну, на які іх і асудзяць.

Але там гаворка ішла пра адзін пісталет і двух падрыхтаваных магазінах. І іх лёгка і нязмушана выявілі. А тона зброі! Прапусцілі? А навошта? Людзі, такія рэчы варта секчы на корані, бо груз падобнага роду можа распыліцца яшчэ ў шляху, не дасягнуўшы нават сядзібы кіраўніка тэрарыстычнай групы. І хто будзе вінаваты, калі прапушчаны ў складзе вышэйзгаданай тоны пісталет раптам стрэліць дзе-небудзь? Віна тых, хто прапусціў, відавочна будзе ані не меншай, чым віна таго, хто страляў.

Не, я не жартую. Усё яшчэ галоўнакамандуючы беларускімі сілавікамі выразна пазначыў межы сітуацыі, а значыць, і магчымыя варыянты развіцця падзеяў.

1. Украінскі МЗС выклікае амбасадара Рэспублікі Беларусь у Кіеве і ўручае ноту з патрабаваннем прад’явіць доказы падобнай «празрыстасці» украінска-беларускай мяжы з украінскага боку. Зразумела, што яшчэ горшымі, чым цяпер, нашыя двухбаковыя адносіны ўжо не стануць, але для ўкраінскіх спецслужбаў прынцыпова важна даказаць, што такога факту не было. І, з майго пункту гледжання, яго не было.

2. Калі факт пропуску тоны зброі беларускімі памежнікамі і мытнікамі быў, то частка службовых асобаў, вінаватых у гэтым пропуску, павінны быць адхіленыя ад займаных пасадаў і накіраваныя пад суд. Зразумела, што спадарыня Ціханоўская і спадар Латушка з іх агентамі значна страшнейшыя, але тона зброі – гэта тона зброі, і грамадзяне маюць патрэбу ў доказе таго, што могуць спаць спакойна. Вінаватыя павінны быць пакараныя.

3. Калі асоба, якая лічыцца кіраўніцтвам беларускіх спецслужбаў і сілавых ведамстваў галоўнакамандуючым, свядома ўведзеная дадзеным кіраўніцтвам у зман для апраўдання сваіх дзеянняў альбо сваёй бяздзейнасці, то дзеянні альбо бяздзейнасць дадзенага кіраўніцтва павінны ў сваю чаргу падвергнуцца службоваму расследаванню.

4. Калі ўсё сказанае зʼяўляецца трызненнем хворага ўяўлення асобы, якая стамілася ад складзенай палітычнай і эканамічнай абстаноўкі (што я таксама не магу выключыць), то службоваму расследаванню павінна падвергнуцца бяздзейнасць лекараў, якія лечаць, асабліва псіхіятра і неўрапатолага, якія абавязаны былі б далажыць пра гэта начальству, аж да стварэння спецыялізаванай камісіі, якая магла б абследаваць асобу, якая лічыцца (чамусьці ўсё яшчэ) высокапастаўленым пацыентам. Як мне здаецца, сапраўдны лекар (пра якога зусім нядаўна згадваў і гэты пацыент) павінен быў бы выканаць свой абавязак. І калі дыягназ пацвердзіўся б, то далей варта ісці па Канстытуцыі, якая ўсё яшчэ дзеіць.

У мяне ўсё, спадары прысяжныя назіральнікі. Я гатовы адказаць на пытанні.

/ІР

 

Меркаванне аўтараў можа не супадаць з пазіцыяй рэдакцыі.

Больш матэрыялаў