Палата прадстаўнікоў 28 чэрвеня ўхваліла ратыфікацыю пагаднення аб стварэнні беларуска-расейскіх вучэбна-баявых цэнтраў, паведамляе Telegram-канал палаты. У дакуменце прапісаны ўзаемны абавязак вайскоўцаў паважаць суверэнітэт краіны, у якой яны знаходзяцца.
Законапраект аб ратыфікацыі пагаднення ўхвалілі 96 галасамі за, супраць не выступіў ніхто, адзін дэпутат не галасаваў. Дакумент прадугледжвае стварэнне ў Беларусі і Расеі сумесных вучэбна-баявых цэнтраў.
Міністр абароны Віктар Хрэнін, рэпрэзентуючы пагадненне Палаце прадстаўнікоў, паведаміў, што асноўныя задачы гэтых цэнтраў – сумесная баявая падрыхтоўка, дзяжурства вайсковых кантынгентаў бакоў, абмен досведам ды ўніфікацыя баявой падрыхтоўкі ўзброеных сілаў.
Дзяржава, якая прымае вайскоўцаў суседняй краіны, будзе за свой кошт забяспечваць іх усім неабходным, дадаў Хрэнін.
Пра «павагу да суверэнітэту» асобна заявіў старшыня пастаяннай камісіі ў міжнародных справах Андрэй Савіных:
«Бакі дамовіліся, што асабовы склад вайсковага кантынгенту боку, што накіроўвае, абавязаны паважаць суверэнітэт і выконваць патрабаванні заканадаўства боку, што прымае, і ўстрымлівацца ад любых дзеянняў, несумяшчальных з палажэннямі гэтага пагаднення».
Пра стварэнне ў нашай краіне вучэбна-баявых цэнтраў у леташнім сакавіку дамовіліся Мінабароны дзвюх краінаў. Паведамлялася, што ў Беларусі будзе два такіх аб’екта.
Сяргей Крот belsat.eu