У Беларусі выпаў першы снег. З пачаткам зімовага сезону медыкі нагадваюць, што кожны год у Рэспубліканскім навукова-практычным цэнтры неўралогіі і нейрахірургіі ў зімовы перыяд фіксуюць дзясяткі зваротаў па медычную дапамогу дзецям, якія ездзілі з горак. Лекары заклікаюць памятаць пра бяспеку.
Зімовыя забавы могуць стаць прычынаю няшчасных выпадкаў, калі не выконваць правілы бяспекі. Кожны год у зімовы перыяд лекары ў РНПЦ неўралогіі і нейрахірургіі фіксуюць дзясяткі зваротаў па медычную дапамогу.
Дзеля прафілактыкі дзіцячага траўматызму лекары нагадваюць асноўныя правілы зімовых забаваў:
- падымацца на горку варта толькі ў месцы, абсталяваным прыступкамі:
- не з’язджаць, пакуль не адышоў у бок папярэдні чалавек;
- не затрымвацца ўнізе;
- не перабягаць лядовую дарожку;
- не катацца, стоячы на нагах;
- не зʼязджаць спінай ці галавой наперад;
- не з’язджаць з горак з няроўным пакрыццём;
- калі нельга пазбегчы сутыкнення з перашкодай, паспрабаваць заваліцца на бок або адкаціцца ў бок ад ледзяной паверхні;
- неадкладна надаць першую дапамогу пацярпеламу, паведаміць пра гэта ў экстраную службу праз тэлефон 103.
Бацькам жа варта памятаць, што з малымі дзецьмі не варта ісці на перапоўненую горку. Абавязкова трэба сачыць за дзіцем і навучыць дзіця правільна падаць.
Алена Аляксандрава belsat.eu
