Нацыянальны банк Беларусі абнавіў на сваім сайце інфармацыю пра стан золатавалютных рэзерваў. Паводле звестак на 1 лістапада, у дзяржаўнай скарбонцы – амаль 7 мільярдаў 590 мільёнаў долараў. Месяц таму было на 87 мільёнаў долараў менш.
Нацбанк Беларусі паведаміў, што на 1 лістапада золатавалютныя рэзервы краіны склалі амаль 7 мільярдаў 590 мільёнаў долараў. Дзяржаўная скарбонка папаўняецца другі месяц запар. У кастрычніку было 7 мільярдаў 503 мільёны. У верасні – 7 мільярдаў 464 мільёны долараў. Такім чынам, за два месяцы рэзервы выраслі амаль на 126 мільёнаў.
Але, калі параўноўваць з пачаткам года, то сёлета золатавалютныя рэзервы скараціліся на 835 мільёнаў долараў. У студзені было крыху менш за 8 мільярдаў 425 мільёнаў.
Са жніўня Нацыянальны банк перастаў распісваць структуру рэзерваў і пазначаць фактары, што паўплывалі на іх змены. Раней рэгулятар падрабязна штомесяц інфармаваў, колькі ў рэзервах валюты, золата і іншых актываў, колькі грошай з рэзерваў пайшло на вяртанне пазык, колькі Нацбанк набываў ці прадаваў валюты на біржы.
Сяргей Крот belsat.eu
