Міністэрства абароны Беларусі абвясціла 4 траўня пачатак «раптоўнага правярання сілаў рэагавання». Як паведамляюць у прэс-рэлізе, падчас правярання воінскія часткі і падраздзяленні будуць адпрацоўваць «пытанні прывядзення ў баявую гатовасць, учынення маршу ў прызначаныя раёны і выканання вучэбна-баявых заданняў».
«Мэта правярання – ацаніць гатовасць і здольнасць асабовага складу аператыўна рэагаваць на магчымае ўзнікненне крызісных сітуацыяў. Воінскія часткі і падраздзяленні будуць дзеяць на незнаёмых участках мясцовасці ва ўмовах абстаноўкі, якая хутка змяняецца», – паведамляе Міністэрства абароны Беларусі.
Удакладняюць, што склад сілаў, якія прыцягваюцца да правярання, будзе паэтапна нарошчвацца.
Паводле Міністэрства абароны, правяранне носіць комплексны характар і не нясе ніякай пагрозы суседнім краінам:
«Захады, што робяцца, ёсць адною з найбольш эфектыўных формаў навучыць войскі і не нясуць ніякай пагрозы ні еўрапейскай супольнасці ў цэлым, ні суседнім краінам у прыватнасці», – адзначаюць у прэс-рэлізе.
Жыхароў Беларусі папярэджваюць пра запланаванае «перамяшчэнне значнай колькасці ваеннай тэхнікі», што можа ўскладніць рух па дарогах агульнага карыстання.
ЗК belsat.eu