Ангела Мэркель у Братыславе
У Братыславе адбываецца нефармальны саміт краінаў ЕЗ.
Канцлер Нямеччыны чакае «канкрэтнага прагрэсу» ад ахопленага крызісам Еўрапейскага звязу, дзякуючы якому атрымаецца ўзнавіць давер грамадзянаў.
«Мы знаходзімся ў крытычнай сітуацыі. Гаворка ідзе пра тое, каб паказаць, што мы можам быць лепшыя», – заявіла Ангела Мэркель незадоўга да пачатку саміту 27 краінаў ЕЗ.
Саміт праходзіць без удзелу Вялікай Брытаніі, якая пажадала пакінуць абʼяднаную еўрапейскую супольнасць.
Прэмʼер-міністр Славакіі Робэрт Фіца адзначыў, што на сённяшнім саміце краіны Еўразвязу распачынаюць шасцімесячны «Братыслаўскі працэс».
«Мы хочам паказаць усім адзінства. Мы хочам паказаць, што праект ЕЗ працягвае існаваць», – заявіў славацкі прэмʼер.
У канцы дня мае быць падрыхтаваная «дарожная карта» найбольш важных тэмаў, якія будуць вырашацца цягам наступных паўгода.