У Менску адбыліся першыя штогадовыя кансультацыі паміж Беларуссю і Еўрапейскім звязам па пытаннях рэалізацыі праектаў і праграмаў міжнароднай тэхнічнай дапамогі (МТД) ЕЗ. Арганізатарамі сустрэчы выступілі Прадстаўніцтва ЕЗ у Беларусі і Міністэрства замежных справаў.
У кансультацыях прынялі ўдзел прадстаўнікі беларускіх органаў дзяржаўнага кіравання, грамадскіх аб’яднанняў і службаў Еўрапейскай камісіі, адказных за рэалізацыю праектаў і праграм МТД ЕЗ.
У сваім прывітальным слове да ўдзельнікаў сустрэчы намеснік міністра замежных справаў Беларусі Алег Краўчанка выказаў задавальненне супрацай з ЕЗ у сферы міжнароднай тэхдапамогі. Вітаў рост абʼёмаў і якасці такой супрацу, уключаючы пашырэнне пераліку фінансавых інструментаў ЕЗ, у якіх удзельнічае наша краіна. Беларускі дыпламат падкрэсліў, што сродкі ЕЗ накіроўваюцца на падтрыманне канкрэтных праектаў у галіне мясцовага і рэгіянальнага развіцця, энергаэфектыўнасці, аховы навакольнага асяроддзя, барацьбы з кліматычнымі зменамі, падтрыманне малога і сярэдняга бізнесу, міжасабовых кантактаў і ў іншых сферах узаемнай цікавасці Беларусі і ЕЗ.
Удзельнікі сустрэчы разгледзелі ход рэалізацыі праектаў МТД ЕЗ і абмяняліся думкамі наконт перспектыўных напрамкаў супрацы.
СК, belsat.eu
