Марыя Калеснікава: Рэжым пераступіў усе межы, у ім больш не засталося нічога чалавечага
Марыя Калеснікава лічыць, што адказнасць за гвалт, пераслед і фальшаванне цалкам нясуць улады ў Беларусі. Свае думкі на гэты конт палітык распавяла з-за кратаў у інтэрв’ю часопісу «Der Spiegel».
Інтэрвʼю з-за кратаў сябра прэзідыума Каардынацыйнай рады беларускай апазіцыі Марыя Калеснікавай нямецкі часопіс «Der Spiegel» апублікаваў 29 лістапада.
Марыя Калеснікава лічыць, што манаполіяй на прымяненне сілы валодае кіраўніцтва краіны і толькі яно нясе адказнасць за тое, што адбываецца ў Беларусі.
«Улады адмянялі законы нашай краіны: мірных грамадзянаў бʼюць, катуюць, калечаць і забіваюць за іх погляды. Мы жывем у паліцэйскай дзяржаве», – канстатуе Марыя Калеснікава.
Гвалт павінен быць спынены, паколькі жаданне ўтрымацца ва ўладзе не можа апраўдаць маштаб гвалту.
Умовы для дыялогу з Лукашэнкам
«Да таго часу пакуль мы як закладнікі сядзім у турме, дыялог не мае ніякага сэнсу. Беларускае кіраўніцтва павінна спачатку выканаць галоўныя патрабаванні нашага народа: вызваліць палітвязняў і пачаць расследаванне злачынстваў, учыненых супраць народа», – упэўненая Марыя Калеснікава.
Канстытуцыйную рэформу, пра якую гавораць афіцыйныя асобы, у тым і Лукашэнка, Марыя Калеснікава расцэньвае як спробу рэжыму падмануць народ для таго, каб утрымацца ва ўладзе. Цяпер у беларускім грамадстве крызіс даверу да кіраўніцтва і да ўсіх дзяржаўных інстытутаў. Марыя Калеснікава кажа, што законы ў краіне не выконваюцца.
«Народ не забудзе гэты кашмар і гэтае супрацьстаянне. Яго барацьба будзе доўжыцца да таго часу, пакуль кіраўніцтва не выслухае нас».
«Людзей збіваюць у дварах так, што яны паміраюць, кветкі прыбіраюць, зносяць мемарыялы. Рэжым пераступіў усе межы, у ім больш не засталося нічога чалавечага. Гэта абсалютнае зло, якое павінна быць спынена», – заявіла Марыя Калеснікава
Марыю Калеснікаву арыштавалі ў межах крымінальнай справы аб публічных закліках да дзеянняў, накіраваных на прычыненне шкоды нацыянальнай бяспецы (ч.3 арт.361 КК), распачатай Генеральнай пракуратурай.
7 верасня спецслужбы выкралі Марыю Калеснікаву і планавалі прымусова яе вывезці за мяжу. Аднак аперацыяў спецслужбаў правалілася: у нейтральнай зоне на мяжы Марыя парвала свой пашпарт, выскачыла з аўта і вярнулася на беларускую тэрыторыю.
СК belsat.eu
Напішы журналісту ліст
Тры беларускія журналісткі ўтрымліваюцца цяпер за кратамі і маюць абвінавачванні паводле крымінальных артыкулаў: Кацярына Андрэева(«Белсат»), Дарʼя Чульцова («Белсат»), Кацярына Барысевіч (TUT.BY).
Адным з моцных спосабаў падтрымаць дзеўчын можа стаць ваш ліст да іх.
Куды пісаць:
Кацярына Андрэева (Бахвалава): 222160 г. Жодзіна, вул. Савецкая, д. 22а.
Дарʼя Чульцова: 222160 г. Жодзіна, вул. Савецкая, д. 22а.
Кацярына Барысевіч: СІЗА № 1, 220030 г. Менск, вул. Валадарскага, д. 2.
Не забудзьцеся ўкласці ў ліст пусты канверт, каб дзеўчыны маглі вам адказаць. Дзякуем за вашую неабыякавасць!
