Расейскі вайсковы самалёт заляцеў у паветраную прастору Ізраілю, заявіў у нядзелю 29 лістапада міністр абароны гэтай краіны Машэ Яалён.
«Адбылося нязначнае ўварванне расейскім самалётам прыкладна на мілю (1,6 км). З пілотам выйшлі на сувязь, і самалёт, змяніўшы курс, вярнуўся ў Сірыю», – заявіў міністр у эфіры радыёстанцыі «Коль Ісраэль».
«Імаверна, гэта была памылка пілота», – дадаў Яалён, адзначыўшы, што самалёт увайшоў у кантраляваную Ізраілем прастору над Галанскімі вышынямі на мяжы з Сірыяй.
Пры гэтым ён не стаў удакладняць, калі менавіта адбыўся інцыдэнт, падае interfax.ru.
Пры гэтым Яалён падкрэсліў: «Расейскія самалёты не атакуюць нас, таму мы не павінны аўтаматычна рэагаваць і збіваць іх, калі адбываюцца памылкі».
24-га лістапада турэцкі знішчальнік збіў расейскі вайсковы самалёт Су-24. Турцыя заявіла, што расейскі бамбавальнік парушыў яе паветраную прастору. У Расеі ж заяўляюць, што самалёт быў збіты на сірыйскай тэрыторыі. Міністэрства замежных спраў абедзвюх краін рэкамендавалі сваім грамадзянам устрымацца ад узаемных паездак, а 28 лістапада Расея ўвяла эканамічныя санкцыі супраць Турцыі.
МЯ, паводле interfax.ru