Грэкі пагадзіліся на новую назву свайго паўночнага суседа.
Пасля 36-гадзіннага абмеркавання парламент Грэцыі ратыфікаваў пагадненне з Македоніяй, паводле якога краіна будзе называцца Паўночная Македонія, падае «Reuters». За падтрыманне пагаднення прагаласавалі 153 дэпутаты, супраць – 146.
Канфлікт Грэцыі з паўночным суседам цягнецца больш за чвэрць стагоддзя: грэкі не пагаджаліся, што гэтая дзяржава выкарыстоўвае назву, якой Грэцыя называе адну са сваіх правінцыяў. Грэкі таксама баяліся, што Скоп’е выступіць да іх з тэрытарыяльнымі прэтэнзіямі. У выніку Афіны шмат гадоў заміналі ўступленню Македоніі ў Еўразвяз і НАТО.
Летась урады абедзвюх краінаў дамовіліся ўрэгуляваць спрэчку. І ў Грэцыі, і ў Македоніі аперацыя выклікала пратэсты нацыяналістаў.
Падчас галасавання ў пятніцу дэпутаты грэцкай правай партыі «Залатая зара» крычалі іншым парламентарыям, што яны здраднікі.
Улетку 2018-га ў Грэцыі праз спрэчкі аб пагадненні з Македоніяй распалася кіроўная кааліцыя.
11 студзеня македонская апазіцыя байкатавала галасаванне аб змене назвы краіны ў парламенце.
ДД
