Дарадца прэзідэнта ЗША па нацыянальнай бяспецы Джон Болтан можа прыехаць у Беларусь ужо на гэтым тыдні. Пра гэта паведамляе выданне Foreign Policy.
Foreign Policy адзначае, што візіт Болтана з’яўляецца апошнім знакам размарожвання стасункаў з «апошняй дыктатурай Еўропы» і гэта можа раззлаваць Маскву. Выданне таксама адзначае, што візіт адбудзецца на фоне спробаў Расеі ўзмацніць інтэграцыю з Беларуссю.
«Болтан добра разумее, што Пуцін праводзіць агрэсіўную палітыку, і што агрэсіўная палітыка Пуціна таксама можа ўключаць нейкія захады ў дачыненні да Беларусі», – заявіў Джон Гэрбст, былы амбасадар ЗША ва Украіне.
У артыкуле не паведамляецца, якія сустрэчы запланаваныя падчас візіту і якія тэмы будуць абмяркоўвацца.
Афіцыйна ні Вашынгтон, ні Менск пакуль не заяўлялі пра візіт Болтана. Тым часам, сам дарадца Трампа анансаваў сваю паездку ва Украіну.
«З нецярпеннем чакаю будучых сустрэч з нашымі партнёрамі ў Кіеве», – адзначыў Болтан у «Twitter».
Раней СМІ паведамлялі, што беларускія ўлады паставілі сабе мэту атрымаць дазвол на продаж нафтапрадуктаў і набыццё сырой нафты ў ЗША. У прыватнасці, Беларуская нафтавая кампанія наняла амерыканскага лабіста Дэйвіда Джэнкарэлі, які мусіць дабіцца ад Вашынгтона ліцэнзіі на гандаль.
ІІ belsat.eu
