Еўрапейскі звяз на сустрэчы каардынацыйнай групы ЕЗ – Беларусь, якая прайшла 24-25 красавіка ў Менску, выказаў занепакоенасць сітуацыяй са свабодай выказвання і сходаў у Беларусі. Пра гэта паведамілі ў прадстаўніцтве Еўразвязу ў Беларусі.
Таксама ЕЗ пацвердзіў сваё непрыманне смяротнай кары і рэкамендаваў Беларусі ўвесці мараторый.
ЕЗ выказаў сваю прыхільнасць найхутчэйшаму завяршэнню перамоў па пытанні Прыярытэтаў партнёрства з Беларуссю. А ўлады Беларусі прадставілі інфармацыю пра падрыхтоўку Нацыянальнага плана па выкананні рэкамендацый праверкі стрэс-тэстаў БелАЭС, а дэлегацыя ЕЗ падкрэсліла важнасць супрацы з Еўрапейскай групай рэгулятараў у галіне ядзернай бяспекі.
Упершыню былі абмеркаваныя перспектывы супрацы ў галіне належнага кіравання. ЕЗ пацвердзіў, што Беларусі неабходна ўсебакова рэфармаваць выбарчае заканадаўства згодна з рэкамендацыямі БДІПЧ АБСЕ ды Венецыянскай камісіі.
Бакі абмеркавалі 20 канкрэтных задач да 2020 года і падрыхтоўку да юбілейных падзей «Усходняга партнёрства». ЕЗ прадставіў свае праграмы фінансавай дапамогі, аб’ём якіх складае прыкладна 30 млн еўра ў год. Дэлегацыі абгаварылі, як узмацніць уздзеянне фінансавай дапамогі і як ЕЗ можа падтрымаць рэформы і мадэрнізацыю ў Беларусі ды забяспечыць пэўныя вынікі для грамадзянаў.
Былі абмеркаваныя перспектывы пашырэння супрацы ў розных сферах. Бакі таксама віталі прагрэс у перамовах пра спрашчэнне візавага рэжыму і рэадмісію ды абмеркавалі рэалізацыю Партнёрства па мабільнасці.
Наступнае пасяджэнне Каардынацыйнай групы пройдзе да канца года ў Бруселі.
МГ belsat.eu