У другой палове дня ў шэраг сталічных установаў паступілі паведамленні аб мініраванні. Наведнікаў і персанал эвакуююць.
Пра гэта распавяла прэс-сакратар МУС Беларусі Вольга Чамаданава ў сваім Telegram-канале:
«У розныя арганізацыі Менску працягваюць паступаць паведамленні пра небяспеку. У гэтай сувязі супрацоўнікамі органаў унутраных спраў прымаюцца дадатковыя меры бяспекі. У гандлёвых цэнтрах, гасцініцах і іншых аб’ектах працягваюць працу сапёрна-піратэхнічныя і следча-аператыўныя групы».
Як паведамляе TUT.BY, людзей эвакуююць з гандлёвых цэнтраў «Галерэя Менск», «Галілеа», «Дана Мол», «Сталіца», а таксама з бізнес-цэнтра «Рубін Плаза» (праспект Дзяржынскага, 5). Гэта звязваюць з паведамленнямі аб мініраванні будынкаў.
Раніцай 19 жніўня ў Менску з аналагічнай прычыны эвакуявалі каля двух тысяч чалавек з будынкаў вакзалу, некаторых гасцініц і аэрапорту.
Як перадаюць карэспандэнты belsat.eu, цяпер з Цэнтральнага аўтавакзалу не адпраўляецца транспарт, выезд з яго перакраты. Усе аўтобусы ад’язджаюць з прыпынкаў гарадскога транспарту.
КА belsat.eu
