Актывіст «Еўрапейскай Беларусі» і блогер Дзмітрый Казлоў, вядомы як Шэры Кот, адбывае арышт за акцыі супраць інтэграцыі з Расеяй.
Дзмітрый Казлоў быў затрыманы 26 снежня і асуджаны за ўдзел у акцыях за незалежнасць Беларусі. Ён адбывае пакаранне ў ІЧУ Воршы. На які тэрмін асуджаны актывіст, невядома, паведамілі ў «Еўрапейскай Беларусі».
30 снежня ў судзе Ленінскага раёну Менску над ім павінен быў адбыцца яшчэ адзін суд, аднак судовы працэс перанеслі на 10 студзеня.
Між тым «Моладзевы блок» паведамляе, што да затрыманага актывіста аб’яднання Стаса Шашка не пускаюць адваката на падставе таго, што «няма месцаў».
«Гэта робяць для таго, каб ізаляваць Стаса. Гісторыя паўтараецца: мы не ведаем, што з ім і ці патрэбна яму дапамогі», – паведамілі ў «Моладзевым блоку».
Стас Шашок быў затрыманы 26 снежня, а на наступны дзень яго асудзілі на 15 содняў арышту.
МГ belsat.eu
