Адпусцілі толькі тых, хто ўмеў перажагнацца па-каталіцку. На Падляшшы ўшанавалі памяць ахвяраў «Бурага»

31 студзеня ў Бельску Падляскім ушанавалі памяць Святых Падляскіх Мучанікаў, у тым ліку і ахвяраў палявога камандзіра Рамуальда Райса.

З нагоды 74-й гадавіны забойства 30 грамадзянаў Польшчы беларускага паходжання ў мясцовай царкве адбылася імша.

Фота: facebook.com/naszapamiec
  • У канцы студзеня і пачатку лютага 1946 атрад капітана Рамуальд Райса «Буры», здзейсніў масавае забойства праваслаўных беларусаў на Беласточчыне. Падчас рэйду атраду было спалена пяць вёсак і па этнічнай прыкмеце забіта 79 праваслаўных беларусаў, уключна з малымі дзецьмі, жанчынамі і старымі.
  • 31 студзеня 1946 года атрад Райса забіў 30 фурманоў, якіх набралі з вакольных вёсак. Дадому адпусцілі толькі тых, хто ўмеў перажагнацца па-каталіцку і прачытаць малітву «Ойча наш» па-польску, астатнія былі забітыя. Паводле журналіста Яна Максімюка, які даследаваў гэтую тэму, фурманаў, імаверна, забілі абухамі сякер, а стралялі толькі ў тых, хто спрабаваў уцячы.
  • 29 кастрычніка 2019 года Сабор біскупаў Польскай аўтакефальнай праваслаўнай царквы ўключы імёны забітых фурманоў у спіс Мучанікаў Падляшша і Хэлмшчыны.
Кіраўнік Сейміка Падляскага ваяводства Багуслаў Дэмбскі і дэпутат Сейміка Славамір Назарук ускладаюць вянок да помніка ахвярам атраду Рамуальда Райса (Бурага). Фота: facebook.com/naszapamiec

Летась МЗС Беларусі выклікала польскага амбасадара праз публікацыю даследавання, якое з’явілася на сайце Інстытуту нацыянальнай памяці Польшчы. Даследаванне ставіць пад сумнеў вынікі следства 2005 года ў справе злачынстваў, здзейсненых атрадам Рамуальда Райса. Інстытут нацыянальнай памяці назваў даследаванне элементам «польскай дыскусіі аб сітуацыі, якая склалася пасля Другой сусветнай вайны».

ЮВ belsat.eu

Глядзі таксама