За год нашая краіна паднялася на тры пазіцыі ў рэйтынгу «чалавечага развіцця».
Штогод ААН складае справаздачу «Human development report». У ім ацэньваецца 188 краінаў паводле такіх крытэраў як чаканая працягласць жыцця, адукацыя, даход на жыхара і г.д.
Сёлета ў рэйтынгу, які змяшчае даклад, Беларусь заняла 50-е месца і дзеліць яго з Расеяй. Год таму нашая краіна была на 53-м месцы.
У Беларусі сярэдняя чаканая працягласць жыцця складае 71,3 гады. На сярэдняга беларуса прыпадае $ 16,676 гадавога нацыянальнага прыбытку. Беларусь уваходзіць у групу краінаў з «высокім узроўнем чалавечага развіцця», першыя 49 краінаў адзначаюцца «вельмі высокім узроўнем».
Узначальвае рэйтынг Нарвегія, якая займае першы радок ужо 12 гадоў запар. Две краіны, якія зазналі найбольшае падзенне ў рэйтынгу за год: Лівія (апусцілася на 27 месцаў) і Сірыя (апусцілася на 15 пазіцый).
Першыя тры краіны рэйтынгу:
1. Нарвегія
2. Аўстралія
3. Швейцарыя
Апошнія тры краіны рэйтынгу:
186. Эрытрэя
187. Цэнтральнаафрыканская рэспубліка
188. Нігер
НМ, belsat.eu
