Пра гэта кіраўнік Беларусі заявіў, прадстаўляючы на пасадзе новага міністра замежных справаў Уладзіміра Макея, перадае «БЕЛТА».
Указы аб прызначэнні на пасаду кіраўніка знешнепалітычнага ведамства Уладзіміра Макея і вызваленні ад гэтай пасады Сяргея Мартынава былі падпісаныя 20 жніўня.
«Я не вельмі ўнікаў, як на гэта адрэагавалі нашыя прыхільнікі і праціўнікі. Хачу заявіць сваю пазіцыю. Прапрацаваўшы амаль дзесяць гадоў на пасадзе міністра, Сяргей Мартынаў адносна даўно выказаў пажаданне папрацаваць на іншай працы. Гэта была ягоная ініцыятыва. Прычым яна, з майго пункту гледжання, выглядала вельмі годна, па-мужчынску, асабліва матывацыя», – адзначыў Лукашэнка.
«Гіпаалергенны» міністр
Высока ацэньваючы прафесійныя якасці Сяргея Мартынава, Лукашэнка падкрэсліў: «Гэта разумны чалавек. У мяне асабіста ён і ягоныя дзеянні ніколі не выклікалі алергіі. Больш за тое (вам, напэўна, гэта вядома), я намагаўся прыцягнуць яго да няпрофільнай, неўласцівай працы, там, дзе трэба аналізаваць. Спадзяюся, што гэта не толькі ягоная была праца, а ўсяго Міністэрства замежных справаў».
Аляксандр Лукашэнка адзначыў, што доўга разважаў над тым, хто будзе працаваць на пасадзе міністра замежных справаў пасля Сяргея Мартынава. Звяртаючыся да прысутных кіраўнікоў падраздзяленняў і працаўнікоў МЗС, ён падкрэсліў: «Магчыма, з новым міністрам вы будзеце генераваць ідэі, якія нам неабходныя не толькі ў знешнепалітычнай дзейнасці, але і дзейнасці ўнутры дзяржавы».
Ніводнай сур’ёзнай памылкі ў вонкавай палітыцы
«Павінен адзначыць, што ў знешнепалітычнай сферы мы не дапусцілі сур’ёзных правалаў і праколаў, якія маглі б негатыўна адбіцца на лёсе нашай дзяржавы. І гэта нягледзячы на велізарны ціск з боку асобных дзяржаваў – за правядзенне намі незалежнага знешнепалітычнага курсу і абарону нашых нацыянальных інтарэсаў», – нагадаў Лукашэнка.
Прадстаўляючы новага міністра замежных справаў Уладзіміра Макея, кіраўнік краіны падкрэсліў: «Не думаю, што вам трэба з размахам і шырока прадстаўляць новага міністра. Уладзімір Макей – чалавек вам вядомы. Ён адзначыўся прынцыпова не толькі ўнутры апарату Міністэрства замежных справаў, але і папрацаваў у замежным прадстаўніцтве нашай дзяржавы. Для вас не сакрэт, што я прыцягваў яго да некаторых знешнепалітычных ініцыятываў. На маё даручэнне ён сустракаўся са шматлікімі кіраўнікамі як на Усходзе, так і на Захадзе, спрабуючы нармалізаваць у асабліва вострыя перыяды нашы адносіны, асабліва на Захадзе. Гэта ў яго атрымлівалася».
Учора Аляксандр Лукашэнка на развітанне з пасадаю міністра ўручыў Сяргею Мартынаву ордэн Айчыны III ступені.
belsat.eu
