Сёння ў Менску прайшоў 16-ы футбольны турнір «Кубак Свабоды» памяці Генадзя Карпенкі.
Згодна з рэгламентам турніру кожная з камандаў згуляла з астатнімі, пераможцу выявілі па колькасці набраных пунктаў. Другі год запар перамагла каманда аргкамітэту стварэння «Беларускага руху». Яна лідаравала ў чатырох гульнях і адну звяла да нічыёй. Другое месца заняла каманда Аб’яднанай грамадзянскай партыі, трэцяе – Беларускага Хельсінкскага камітэту (БХК).
У турніры таксама бралі ўдзел каманды Беларускай асацыяцыі журналістаў (БАЖ), Партыі БНФ, руху «За Свабоду». Увогуле спаборніцтвы праходзілі карэктна, але не абышлося і без траўмаў: руку зламаў брамнік БАЖ Міхась Янчук.{movie}Анатоль Лябедзька пра “Кубак Свабоды”|left|5916{/movie}
За час правядзення турніру памяці Карпенкі чатыры разы ўладальнікам галоўнага трафею станавілася зборная журналістаў. Тройчы на турніры перамагала каманда АГП і зборная Партыі БНФ, двойчы – Беларускай партыі левых «Справядлівы свет», па адным разе – зборныя фонду імя Карпенкі ды Кансерватыўна-хрысціянскай партыі БНФ.
«У сувязі з апошнімі падзеямі, запалохваннем, страхам, мы ўсе расцярушыліся, але футбол аб’ядноўвае», – выказаўся Эдвард Баланчук з Беларускага Хельсінкскага камітэту.
Старшыня Аб’яднанай грамадзянскай партыі Анатоль Лябедзька падкрэсліў: «Турнір памяці Генадзя Карпенкі – гэта не толькі футбол, але і мажлівасць камунікацыі па-за чыстаю палітыкаю». Палітык дадаў: «Акадэмік, палітык, грамадскі дзеяч Генадзь Карпенка – той, каго сёння нам моцна не хапае».{movie}Эдвард Баланчук пра турнір памяці Генадзя Карпенкі|left|5917{/movie}
Турнір «Кубак Свабоды» праводзіцца з 1997 года. Да гэтага падобныя спаборніцтвы былі прымеркаваныя да прыняцця Дэкларацыі аб суверэнітэце Рэспублікі Беларусь і ў іх актыўна ўдзельнічаў сам Генадзь Карпенка. Пасля смерці палітыка турнір назвалі яго імем. Генадзь Карпенка памёр 6 красавіка 1999 г. ва ўзросце 49 гадоў, праз тыдзень пасля таго, як перажыў інсульт. Раптоўная смерць апазіцыйнага палітыка выклікала шмат пытанняў, якія да гэтага часу застаюцца без адказу.
belsat.eu
