Belsat.eu падводзіць вынікі чарговага дня супрацьстаяння беларускага народу і ўладаў.
Пратэсты: пенсіянеры, медыкі і студэнты
У цэнтры Менску 9 лістапада адбыўся супольны марш пэнсіянэраў і медыкаў у падтрымку пераменаў у Беларусі.
Удзельнікі маршу сабраліся на плошчы Незалежнасці і прайшлі шэсцем па праспекце. Людзі неслі бел-чырвона-белыя сцягі, перыядычна скандавалі «Жыве Беларусь!», «Гэта наш горад!», «Трыбунал», «Сыходзь!», «Лукашэнка ў аўтазак» і іншыя лозунгі. У акцыі прынялі ўдзел больш за тысячу чалавек.
Акрамя таго, каля 30 працаўнікоў МНПЦ хірургіі, транспланталогіі і гематалогіі сёння ў 7.30 правялі акцыю салідарнасці з затрыманымі калегамі.
Працягваліся і студэнцкія пратэсты. Акцыі салідарнасці ладзілі сёння студэнты БДУ каля галоўнага корпусу ўніверсітэту і ў сценах Факультэту прыкладной матэматыкі і інфарматыкі.
Таксама правялі акцыі навучэнцы МДЛУ і БДАМ.
Дыпламатычныя вайна
Вайсковы аташэ Вялікай Брытаніі Тымаці Уайт і намесніца амбасадара Ліза Тамвуд былі абвешчаныя ўладамі Беларусі персонамі non grata. Тэлеканал ОНТ абвінаваціў брытанскіх дыпламатаў у тым, што падчас учорашняй акцыі пратэсту яны вельмі доўга сядзелі ў кавярні на праспекце Пераможцаў. Сцвярджаецца, гэтыя дыпламаты «збіралі інфармацыю аб унутрыпалітычнай сітуацыі ў Беларусі і аб ходзе пратэстаў».
«Міністэрствам замежных справаў Беларусі 8 лістапада 2020 года з прычыны дзейнасці несумяшчальнай са статусам дыпламатычнага агента, статусам дыпламата, а таксама з мэтамі знаходжання ў Беларусі прынятае рашэнне аб абвяшчэнні двух дыпламатаў амбасады Вялікай Брытаніі персонай non grata», – паведаміў прэсавы сакратар МЗС Анатоль Глаз.
Міністр замежных справаў Вялікай Брытаніі Дамінік Рааб назваў рашэнне беларускіх уладаў «абсалютна неабгрунтаваным».
Сёння ж у МЗС Беларусі была праведзена сустрэча з часовым павераным у справах амбасады Польшчы ў Беларусі Марцінам Вайцяхоўскім. Як адзначаецца ў прэс-рэлізе МЗС, «беларускі бок выказаў заклапочанасць у сувязі з пацверджанымі і задакументаванымі фактамі арганізаванай злачыннай дзейнасці з тэрыторыі Польшчы, якая прычыняе шкоду жыцця і здароўю беларускіх грамадзянаў, грамадскай бяспекі, дзяржаўнаму і прыватнаму маёмасці ў Рэспубліцы Беларусь».
Крымінальны пераслед за пратэсты
Сёння стала вядома, што Генеральная пракуратура накіравала ў суд больш за 100 крымінальных справаў, звязаных з пратэстамі. Па 16 з іх ужо вынесены прысуды.
У ведамстве ўдакладняюць, што гаворка ідзе пра крымінальныя справы звязаныя з масавымі беспарадкамі, удзелам грамадзянаў у несанкцыянаваных мерапрыемствах, супрацівам, гвалтам і пагрозай яго ўжывання ў дачыненні міліцыянтаў, а таксама пакрыцці шкоды, прычыненай дзяржаўнай маёмасці супрацьпраўнымі дзеяннямі.
Следчы камітэт сёння паведаміў яшчэ пра дзве крымінальныя справы, звязаныя з пратэстамі, расследаванне па якім ужо завершана. 34-гадоваму менчуку выстаўлена абвінавачванне паводле ч. 2 арт. 363 (супраціў міліцыянту, спалучаны з ужываннем гвалту). Падставай для пераследу стаў інцыдэнт, які адбыўся падчас Маршу герояў 13 верасня на вуліцы Мельнікайтэ, калі пры затрыманні «невядомыя аказалі актыўны супраціў» міліцыянту.
А 25-гадоваму жыхару гораду Баранавічы выстаўлена абвінавачванне паводле арт.364 (ужыванне гвалту ў дачыненні міліцыянта): яго вінавацяць у тым, што 10 жніўня ён здзейсніў наезд аўтамабілем на міліцыянта. Відэа наезду раней публікаваў МУС. На кадрах бачна, што некалькі сілавікоў у шлемах спрабуюць перакрыць рух машыне, але кіроўца ўсё роўна з’язджае зачапіўшы аднаго з міліцыянтаў – той фактычна праехаўся па капоце аўтамабіля. Міліцыянт траўмаў не атрымаў.
Суды над медыкамі і ціск на журналістаў
Учора, падчас Маршу народаўладдзя, сілавікі затрымалі больш за 1000 чалавек, шмат хто быў моцна збіты. Сёння больш за 200 затрыманых судзілі: іх каралі адміністратыўным арыштам або штрафам.
У тым ліку 9 лістапада судзілі лекараў, якіх затрымалі яшчэ ў суботу. Напрыклад, анестэзіёлаг-рэаніматолаг Уладзімір Кравец, траўматолаг Ігар Чанцаў і вядомы псіхіятр Сяргей Папоў былі пакараныя 15 соднямі арышту кожны, а анколагі Аляксандр Мініч і Святлана Дабрыян атрымалі па 13 содняў.
Працягваецца ціск на журналістаў. Сёння адбыўся вобшук у галоўнай рэдактаркі недзяржаўнай «Газеты Слонімскай» Ганны Валадашчук. Пасля з ператрусам прыехалі і ў саму рэдакцыю «Газеты Слонімскай», дзе забралі камп’ютары. Валадашчук праходзіць сведкай у крымінальнай справе за абразу работніцы сістэмы адукацыі, але Ганна адмаўляе дачыненне да паклёпніцкіх паведамленняў у мясцовых тэлеграм-каналах.
ІІ belsat.eu
