Belsat.eu падводзіць вынікі чарговага дня супрацьстаяння беларускага народу і ўладаў.
31 кастрычніка ў Менску працягваюцца акцыі пратэсту. У другой палове дня адбыліся адразу дзве акцыі: суботні жаночы марш і акцыя людзей з інваліднасцю.
Жаночы марш 31 кастрычніка прайшоў пад лозунгамі салідарнасці з тымі хто бастуе. Падчас шэсця жаночая калона абʼядналася з людзьмі з інваліднасцю, якія распачалі сваю акцыю каля Чырвонага Касцёлу.
Праект паправак у КаАП прайшоў першае чытанне ў Палаце прадстаўнікоў, піша TUT.BY. Чакаецца, што новая рэдакцыя Кодэксу адміністратыўных правапарушэнняў набудзе моц ад 1 студзеня 2021. Перадусім будзе ўзмоцненая адказнасць за ўдзел у несанкцыянаваных акцыях.
Арышт па артыкуле 23.34 можа быць павялічаны з 15 да 30 содняў, а памер штрафу павялічаны да 100 базавых за першы выпадак і 200 базавых за паўторны (і зменены нумар артыкула, але сэнс яго той жа). За «Непадпарадкаванне законнаму распараджэнню ці патрабаванню службовай асобы пры выкананні ім службовых паўнамоцтваў» могуць павялічыць штраф з 50 да 100 базавых. З’явіцца і новы артыкул. За «Незаконнае выкарыстанне сцягоў, вымпелаў, эмблем, выраб, распаўсюджванне плакатаў, эмблем і сімвалаў» можа з’явіцца штраф да 20 базавых фізічнай асобе.
Юрыст і палітзняволены Максім Знак не піша ў СІЗА Канстытуцыю, як раней сцвярджала Лілія Уласава.
Пра гэта распавёў ягоны абаронца Дзмітрый Лаеўскі.
«Ягоная творчасць у СІЗА цяпер пераважна складаецца ў напісанні вершаў і песень. Як высокакваліфікаваны юрыст ён мае свой пункт гледжання ў розных прававых пытаннях, у тым ліку ў канстытуцыйных нормах. Аднак наконт удзелу ў Канстытуцыйнай рэформе ён мае прынцыповую пазіцыю: ён не стане што-небудзь рабіць, пакуль не будуць выкананыя тры ўмовы з іх афіцыйным публічным замацаваннем у нарматыўным акце: першае – вызначэнне дакладных тэрмінаў рэферэндуму; другое – адкрытае і публічнае абмеркаванне праектаў канстытуцыі; трэцяе – гарантыі незалежнага фармавання выбаркамаў, а таксама празрыстасць галасавання і падліку галасоў», – кажа Лаеўскі.
З 1 лістапада наша краіна часова прыпыняе перасячэнне мяжы на ўезд для замежных грамадзянаў і асобаў без грамадзянства. Прычынаю для абмежавання з’яўляецца пандэмія каронавірусу.
Паводле пастановы Саўміну, часова абмяжоўваецца ўезд замежных грамадзянаў на аўтадарожных пунктах пропуску, пунктах спрошчанага пропуску, пунктах пропуску на чыгуначных вакзалах (станцыях), пунктах пропуску ў рачных партах. Але праз аэрапорт замежнікі могуць прылятаць у Беларусь. Ёсць таксама і шэраг іншых выключэнняў.
Міністр адукацыі Ігар Карпенка: для студэнтаў у ВНУ павінны быць створаны бяспечныя ўмовы
«Мы змагаемся не з іншадумствам і грамадзянскай пазіцыяй студэнтаў, як падаюць некаторыя Telegram-каналы, а з праявай прававога нігілізму з боку асобных маладых людзей, грубым парушэннем унутранага распарадку, праявай агрэсіі і хамства ў адносінах да выкладчыкаў і адміністрацыі ВНУ».
СК belsat.eu