Аляксандр Лукашэнка 31 снежня разаслаў віншаванні з навагоднімі святамі шэрагу замежных лідараў і ад некаторых сам атрымаў віншаванні. Спісы апублікавала дзяржаўнае інфармагенцтва «БелТА». Мы наклалі гэтыя спісы на мапу.
Першым чынам «БелТА» адзначае, што Аляксандр Лукашэнка накіраваў віншаванні кіраўніцтву Расеі (у тым ліку асабіста Уладзіміру Пуціну) і кіраўнікам дзяржаваў СНД. Далей – доўгі спіс кіраўнікоў дзяржаваў і міжнародных арганізацыяў. У гэтым спісе адметна вось што:
- Лукашэнка не павіншаваў кіраўнікоў суседніх Украіны, Польшчы, Літвы і Латвіі. З усіх суседзяў – толькі кіраўніка Расеі.
- З усяго Еўразвязу Лукашэнка павіншаваў кіраўнікоў Балгарыі, Вугоршчыны і Люксембургу. Таксама павіншаваў кіраўнікоў дзяржаваў-чальцоў NATO Турэччыны і Чарнагорыі.
- Затое павіншаваў большую частку Азіі і Паўднёвай Амерыкі. Афрыку амаль не закрануў.
- Павіншаваў прэзідэнта Рэспублікі Сербскай у складзе Босніі і Герцагавіны, але не кіраўніка ўсёй Босніі і Герцагавіны або другой ейнай паловы – уласна Федэрацыі Босніі і Герцагавіны і акругі Брчко.
- Павіншаваў дыктатараў з Венесуэлы, Сірыі, Туркменістану і Паўночнай Карэі, але не павіншаваў дыктатараў Ірану і Эрытрэі, ваенную хунту М’янмы або тэрарыстаў, якія захапілі ўладу ў Афганістане.
- Павіншаваў кіраўнікоў армянскай апостальскай царквы, каталіцкай царквы і расейскай праваслаўнай цэрквы, кіраўніка Мальтыйскага ордэну, кіраўнікоў Арганізацыі аб’яднаных нацыяў і Чырвонага крыжу.
Спіс тых, хто павіншаваў самога Лукашэнку, значна карацейшы. У ім кіраўнікі Аб’яднаных арабскіх эміратаў, Азербайджану, Арменіі, В’етнаму, Казахстану, Кітаю, Кувейту, Кыргызстану, Манголіі, Палестыны, Расеі, Таджыкістану, Туркменістану і Узбекістану.
Ці замерзне Еўропа на Новы год? Глядзім на мапу надвор’я
Алесь Наваборскі belsat.eu
