Прэм’ер-міністр Раман Галоўчанка лічыць, што буйны бізнес, вытворчасць і гандаль нібыта ўжо цалкам адаптаваліся пад рэгуляванне коштаў і спакойна працуюць. Дробныя прадпрымальнікі павольней адаптуюцца да сітуацыі, піша БелТА.
Раман Галоўчанка падчас справаздачы Аляксандру Лукашэнку заявіў, што бізнес, вытворцы, гандаль практычна адаптаваліся, каб перабудаваць сваю працу. Цяпер, паводле меркавання прэмʼер-міністра, бізнес спакойна працуе. Чыноўнік таксама кажа, што многім цяжка змірыцца, што больш не атрымаецца накручваць на тавар па 100-200 %.
«Рэальны сектар эканомікі, у тым ліку прыватная вытворчасць, жыве з рэнтабельнасцю 7-10 % і лічыць гэта нармальнай, 15 % – гэта, як кажуць, за шчасце. Думаю, прадпрымальнікі, гандаль, вытворцы будуць узмоцнена працаваць над выдаткамі. Гэта вельмі важны складальнік фармавання сабекошту і адпаведна кошту», – падкрэсліў Раман Галоўчанка.
Лукашэнка ў сваю чаргу запатрабаваў намер жорстка кантраляваць працу бізнесу.
«Мы не аднойчы падыходзілі да пытанняў працы вось гэтых так званых іпэшнікаў, якія возяць тавар і ў якіх няма нават накладных на гэты тавар. І тады мы дамаўляліся, што трэба дапамагчы індывідуальным прадпрымальнікам, якія займаюцца падобным гандлем, стварыць аптовыя пастаўкі прадукцыі ў Беларусь. Наўпрост у Беларусь. Каб яны не ездзілі па закутках Расеі, Турцыі або Кітаю. Ім там уцюхваюць гэты тавар без накладных. Незразумела па якіх коштах. Ды і сертыфікаты не заўсёды нармальныя«, – сказаў Аляксандр Лукашэнка.
Лукашэнка загадаў чыноўнікам, каб яны стварылі магчымасці для працы бізнесоўцаў, але пры гэтым каб кантралявалі кошты.
Тым часам прадпрымальнікі ў Беларусі вымушана спыняюць працу, паколькі не разумеюць механізмаў і патрабаванняў. Эксперты лічаць, што рэгуляванне коштаў у доўгатэрміновай перспектыве можа прывесці да дэфіцыту і складанасцямі з пастаўкамі тавараў.
Алена Аляксандрава belsat.eu