Стваральнікі сатырычнага YouTube-шоу «ЧынЧынЧэнэл» знялі кароткаметражны фільм «ЧынЧыны праляцелі зязюляй», прэм’ера якога адбылася 31 жніўня на YouTube.
«Паводле сюжэту, які не саступае па інтрызе замежным аналагам, ганаровыя чальцы ЧынЧынЧэнэл Сяргей Мікалаевіч і Мікалай Сяргеевіч прыбываюць у Лядскую псіхіятрычную лякарню № 1, каб наведаць таямнічую пацыентку Алену ЖалудOk. І нішто не прадвяшчала нічога нечаканага, аднак далейшыя падзеі прымушаюць здзіўлена ўскінуць бровы нават дасведчанага кінамана», – гаворыцца ў апісанні фільму.
Рэжысёр-пастаноўшчык карціны – Андрэй Кашперскі, аўтарамі сцэнара выступілі Андрэй Кашперскі і Міхаіл Зуй.
Акторскі склад: Міхаіл Зуй, Дзмітрый Есяневіч, Алена Зуй-Вайцяхоўская, Андрэй Каралевіч, Марыя Савушкіна, Андрэй Кашперскі і, як адзначаецца, упершыню на экранах – Алена ЖалудOk.
У фільме прэзентаваны новы кліп Алены ЖалудOk на песню «Лядская псіхіятрычная».
Паглядзець «ЧынЧыны праляцелі зязюляй» можна праз спасылку.
Акрамя таго, Андрэй Кашперскі і Міхаіл Зуй сталі аўтарамі праектугалоўнай прэм’еры гэтага года – серыялу «Працэсы» вытворчасці тэлеканала «Белсат».
Падрабязнасці аб гэтым праекце з’явяцца ў панядзелак, 4 верасня. Сачыце за навінамі на сайце, у сацыяльных сетках і эфіры «Белсату».
Раман Шавель belsat.eu
