«Найгоршая санкцыя супраць Расеі – падзенне дыктатуры Лукашэнкі» – кіраўнік МЗС Эстоніі
Міністр замежных справаў Эстоніі Урмас Рэйнсалу 30 лістапада на спатканні міністраў замежных справаў дзяржаваў NATO ў Бухарэсце (Румынія) адказаў на пытанне Сяргея Пелясы, карэспандэнта «Белсату».
«Беларуссю кіруе нелегітымны дыктатар Лукашэнка. Найгоршая санкцыя, якую мы можам увесці супраць расейскага рэжыму, – гэта падзенне дыктатуры Лукашэнкі», – заявіў эстонскі міністр.
29 лістапада абраная прэзідэнтка Беларусі Святлана Ціханоўская выступіла на Мюнхенскай канферэнцыі лідараў у Бухарэсце. У сваім выступе яна заклікала прызнаць рэжым Лукашэнкі спонсарам тэрарызму і пашырыць санкцыі на працаўнікоў дзяржаўных медыяў, КДБ і спецслужбаў. Таксама Ціханоўская заклікала пашырыць выдачу візаў для беларусаў у беларускіх гарадах і падтрымаць рэпрэсаваных.
«Расея падарвала суверэнітэт Беларусі падпісаннем новых дамоваў аб вайсковай і эканамічнай інтэграцыі. Яны падпісаныя з дыктатарам, які не мае права нічога падпісваць ад імя народу, пасля таго, як страціў усялякую легітымнасць у 2020 годзе», – нагадала Святлана Ціханоўская.
Таксама Ціханоўская сустрэлася з прэм’ер-міністрам Румыніі Нікалаэ Чукэ, беларусамі, якія жывуць у гэтай краіне, і выступіла ў румынскім парламенце і ў Бухарэсцкім універсітэце.
Якуб Хруст belsat.eu
