Міліцыянты ў Менскай вобласці затрымалі мужчыну, які спрабаваў выкрасці Біблію 1780 года выдання, паведамляе МУС Беларусі ў сваім Telegram-канале. Уладальнік захоўваў кнігу ўдома.
Жыхар Вялейскага раёну звярнуўся ў міліцыю з паведамленнем пра спробу скрасці ягоную Біблію 1780 года выдання. Са словаў мужчыны, ён працаваў у агародзе, калі заўважыў знаёмага, што выходзіў з ягонага дому на падворак. Пабачыўшы гаспадара, зламыснік кінуў заплечнік і збег. У торбе была старажытная кніга.
У Міністэрстве ўнутраных справаў распавялі пра затрыманне падазраванага і паведамілі, што ён жыхар суседняй вёскі, сёлета вызваліўся з калоніі. Мужчына ведаў, што ягоны знаёмы мае гэтую каштоўную Біблію.
Следчыя завялі крымінальную справу. Кніга цяпер на мастацтвазнаўчай экспертызе. Папярэдне рарытэт ацанілі ў 7 тысяч рублёў.
Сяргей Крот belsat.eu