Папа Рымскі Францішак тройчы звяртаўся да прэзідэнта Расеі Уладзіміра Пуціна наконт эвакуацыі людзей з абложанага расейскім войскам украінскага Марыупалю. Пра гэта паведамляе італьянская газета «Il Messaggero».
Першыя два разы Папа Францішак прапаноўваў Пуціну дазволіць вывезці марыупальцаў гуманітарным калідорам на тэрыторыі, падкантрольныя Украіне. Гэтыя просьбы перадаваліся Пуціну ў канцы сакавіка і бліжэй да Вялікадня па канфідэнцыйных каналах. Пры гэтым Папа быў гатовы накіраваць у Марыупаль з Польшчы свайго даверанага кардынала ў гуманітарных пытаннях Конрада Краеўскага.
Трэці раз Францішак прапанаваў вывезці цывільнае насельніцтва з «Азоўсталі» на караблі пад сцягам Ватыкану праз порт.
Але ўсе тры разы ўлады Расеі не пагадзіліся на гэта.
У блакаваным расейскімі войскамі металургічным камбінаце «Азоўсталь» у Марыупалі – шэсцьдзесят дзяцей. Самаму малодшаму – чатыры месяцы. Пра гэта распавёў у інтэрв’ю CNN камандзір 36-й асобнай брыгады марской пяхоты ЗСУ Сяргей Валынскі (Валына). Ён звярнуўся да сусветных лідараў з просьбаю дапамагчы стварыць гуманітарны калідор для вайскоўцаў і цывільных асобаў на тэрыторыю, падкантрольную ўраду Украіны, ці ў трэцюю краіну. Сітуацыя, паводле яго, крытычная.
ПС belsat.eu