Паўночная Карэя 30 студзеня, магчыма, запусціла ў бок Японскага мора балістычную ракету. Пра гэта паведамляюць японскія і паўднёвакарэйскія ўлады.
Паводле прадстаўніка ўрада Японіі Хіракадзу Мацуны, «неапазнаны снарад» праляцеў каля 800 км, максімальная вышыня палёту склала каля 2 тыс. км. Звестак пра шкоду ад пуску пакуль няма.
Паўднёвакарэйскія вайскоўцы мяркуюць, што запуск ажыццявілі з правінцыі Чаганда. Ракета перавысіла хуткасць гуку ў 16 разоў, як мяркуецца, гэта была ракета сярэдняй далёкасці «Хвасон-12».
Гэта сёмы пуск, які Паўночная Карэя зрабіла з пачатку года.
У КНДР заяўляюць, што іх зброя не накіраваная на канкрэтную дзяржаву і не пагражае суседнім краінам, а толькі з’яўляецца часткай мадэрнізацыі арміі. А ў выпадку ўвядзення новых санкцыяў за ракетныя пускі абяцаюць даць «рашучы адказ».
МГ belsat.eu