Беларускі лыжнік выказаўся ў Facebook Сяргей Далідовіч выказаўся з нагоды падтрыманай уладамі ідэі прызнаць экстрэмісцкім бел-чырвоны-белы сцяг.
«На тэму сцяга. Калі прызнаюць БЧБ-сцяг экстрэмісцкім (нічому не здзіўлюся), ці значыць гэта, што я фашыст, калі выступаў у Лілехамеры ў 1994 годзе пад гэтым сцягам? І што рабіць з архіўнымі фота з той Алімпіяды – ірваць і спальваць, каб не расстралялі?» – напісаў спартовец.
Сяргей Далідовіч – адзіны ў сусветнай гісторыі лыжнік, які ўдзельнічаў у сямі Алімпіядах. У 2014 годзе ён быў уганараваны Ордэнам Пашаны.
29 студзеня стала вядома, што «неабыякавыя грамадзяне» накіравалі ў Генпракуратуру зварот, у якім просяць вызнаць бел-чырвона-белы сцяг экстрэмісцкім. Адпаведны пакет законаў ужо рыхтуюць.
З крытыкай такой забароны ўжо выступіла Святлана Ціханоўская і нават дзейны дэпутат Палаты прадстаўнікоў Валерый Варанецкі.
Каардынацыйная рада стварыла петыцыю супраць прызнання бел-чырвона-белай сімволікі экстрэмісцкай. На гэты момант яе падпісалі больш як 14 000 чалавек. У Менску між тым ужо прайшоў марш у падтрыманне БЧБ-сімволікі.
МГ belsat.eu