Раніцай суботы 29 ліпеня ў Мёрах Віцебскай вобласці адбылося трагічнае ДТЗ. Пажылая мясцовая жыхарка загінула пад коламі смеццявоза, кіроўца не заўважыў яе. Пра гэта паведамляе УДАІ УУС Віцебскай вобласці.
За стырном смеццявоза быў малады мужчына 1991 года нараджэння. Пасля пагрузкі кантэйнера са смеццем ён пачаў рухацца, не пераканаўшыся ў бяспецы манеўру.
Заднім левым колам смеццявоз наехаў на жанчыну 1942 года нараджэння, якая была на праезнай частцы.
Ад атрыманых цялесных пашкоджанняў жанчына памерла на месцы.
Падобны трагічны выпадак здарыўся ў жніўні мінулага года. Тады ў Віцебску смеццявоз наехаў на дзяўчынку на ровары, якая выехала на дарогу. З цялеснымі пашкоджаннямі дзіця даставілі ў больніцу, але праз некаторы час дзяўчынка памерла. У дачыненні 26-гадовага кіроўцы грузавіка распачалі крымінальную справу паводле ч. 2 арт. 317 КК РБ.
Алена Рувіна belsat.eu
