НАУ прапануе прыняць санкцыі супраць імпарту тавараў, якія вырабляюць палітзняволеныя ў турмах
Народнае антыкрызіснае ўпраўленне прапануе Еўразвязу ўвесці адмысловы праваабарончы санкцыйны пакет супраць імпарту груп тавараў, якія палітзняволеныя вырабляюць ва ўстановах Дэпартамента выканання пакаранняў МУС Беларусі.
Аб гэтым заявіў кіраўнік НАУ у эфіры «Радыё Рацыя» Павел Латушка.
«Па пытаннях санкцыйнай палітыкі мы прапаноўваем санкцыйны пакет у сувязі з выкарыстаннем прымусовай працы палітзняволеных на тэрыторыі Беларусі – у турмах, у следчых арыштах. Канкрэтны пакет, з таварамі, з катэгорыямі тавараў. Мы далі поўнае абгрунтаванне, каб гэта знаходзілася ва ўрадзе Польшчы. Усе гэтыя дакументы пайшлі», – адзначыў Павел Латушка.
Акрамя таго, палітык заклікаў гарманізаваць гандлёвыя санкцыі супраць рэжымаў Лукашэнкі і Пуціна. Адпаведная інфармацыя ўжо перададзеная ў польскае Міністэрства замежных справаў.
Пытанне ўвядзення санкцыяў у дачыненні да Дэпартаменту выканання пакаранняў уздымалася і раней. Так, палітолаг Ігар Тышкевіч яшчэ ў 2020 годзе казаў пра тое, што ўключэнне гэтай «фактычна камерцыйнай структуры» ў санкцыйны спіс было б лагічным, бо, сярод іншага, яна займаецца вытворчасцю дубінак, шчытоў, абсталявання, а разам з тым вырабляе і «добрую мэблю, і тэкстыль, якія ВЕЛЬМІ танна прадаюцца еўрапейскім кампаніям». Пры гэтым уся прадукцыя робіцца зняволенымі, у тым ліку і палітычнымі, і ейны сабекошт вельмі нізкі, бо зняволеныя робяць гэтую прадукцыю практычна бясплатна.
Раман Шавель belsat.eu
