Следчы камітэт Беларусі зладзіў брыфінг на тэму «Спецыяльнае вядзенне», падчас якога прагучала пра змаганне ў краіне з «экстрэмізмам».
Барацьба з «экстрэмізмам» у Беларусі займае асобае месца ў працы Следчага камітэту. Цяпер следчыя актыўна працуюць над такога кшталту «злачынствамі».
«За здзейсненыя злачынствы адміністратарам экстрэмісцкага фармавання «Чорная кніга Беларусі» пагражае да 12 гадоў пазбаўлення волі», – адзначыў начальнік Галоўнага следчага ўпраўлення Яўген Архірэеў.
Акрамя таго, следчыя цяпер распачалі спецыяльнае вядзенне у дачыненні кіраўнікоў і ўдзельнікаў Беларускага фонду спартовай салідарнасці. Таксама вылучылі і дзейнасць прадстаўнікоў Каардынацыйнай рады.
«Прадстаўнікі арганізацыі з мэтай захопу ўлады неканстытуцыйным шляхам стварылі экстрэмісцкае фармаванне і заклікалі да санкцыяў і іншых незаконных дзеянняў, накіраваных на прычыненне шкоды нацыянальнай бяспецы Беларусі», – адзначыў Яўген Архірэеў.
Справу ўдзельнікаў і кіраўнікоў Праваабарончага цэнтру «Вясна», «Нехта» і Валерыя Цапкалы таксама вынеслі ў асобнае вядзенне.
Адметна, што ў нашай краіне сілавікі называюць «экстрэмісцкай» або «тэрарыстычнай» любую апазіцыйную дзейнасць.
Спецыяльнае вядзенне дазваляе суддзям разглядаць справу без прысутнасці абвінавачанага, гэта значыць, прысуд выносяць завочна.
Алена Аляксандрава belsat.eu
