Як стала вядома дзякуючы прэс-службе РБ РФ, 29 чэрвеня ў Менск прыедзе сакратар Рады бяспекі Расеі Мікалай Патрушаў. Ягоны візіт прымеркаваны да кансультацый па пытаннях бяспекі. Раней аб гэтым візіце анонсаў заўважана не было.
Візіт кадра N2 у крамлёўскай іерархіі пасля нядаўняга рашэння Менску аб фактычным разрыве адносін з ЕЗ выклікае асаблівую цікавасць як на Захадзе, так і на Ўсходзе. Пасля нядаўняй сустрэчы ў Жэневе прэзідэнтаў РФ і ЗША, якую рэальна рыхтаваў Патрушаў, а не Лаўроў, безумоўна, прыцягвае вялікую ўвагу назіральнікаў развіццё і стан амерыкана-расейскіх адносінаў. Як прыцягнуў увагу і апошні артыкул Патрушава ў расейскіх СМІ.
А чаканне званка ў Менск з Пекіну і зусім надае паводзінам беларускага саюзніка глабальны маштаб.
Паколькі вялізны недавер у міжнародных адносінах узнік пасля анэксіі Крыму і пачатку вайны на Данбасе. Але наступаюць нейкія новыя рэаліі, якія, трэба меркаваць, паспрабуе данесці Маскоўскі госць – сакратар Рады бяспекі РФ Мікалай Патрушаў.
Мяркуючы па пазыўным, якія прагучалі нядаўна з памежных заходніх абласцей Беларусі, у кіраўніцтве Беларусі могуць адчуваць павышаную нервовасць напярэдадні прыезду Патрушава. Хто б што не казаў, але сёння ў Крамля няма поўнага даверу да свайго беларускага хаўрусніка, які пажадаў выбраць непрадказальнасць у сваіх паводзінах. Так можна разумець некаторыя заявы заходніх і іншых палітыкаў. І гэта на фоне адсутнасці дыялогу з НАТО і ЕЗ. Што ў РФ, што ў РБ. Наступіла пааўза, якая патыхае мерцвячынай. Напярэдадні чаго?
А Патрушаў, будучы адным з ідэолагаў сучаснай дактрыны расейскай бяспекі, неаднаразова ў сваіх публічных выступах падкрэсліваў узмацненне пагрозы НАТО для Расеі. Пры гэтым, не забываючыся і на свайго беларускага хаўрусніка, якому, мабыць, спатрэбіўся рэвізор.
Раман Якаўлеўскі/АА, палітычны аглядальнік
