У Міністэрстве энергетыкі Беларусі пракаментавалі, што пакуль інфармацыю аб прыпыненні паставак абсталявання з боку кампаніі «Siemens» ведамства не атрымала.
Народнае антыкрызіснае ўпраўленне сёння паведаміла, што Шведскае Экспартна-крэдытнае агенцтва (EKN) замарожвае ўгоду з Беларуссю на час далейшага разгляду сітуацыі ў тым ліку і звязанай з санкцыямі. Міністэрства энергетыкі адрэагавала на гэтую інфармацыю.
«Афіцыйна інфармацыі аб прыпыненні паставак абсталявання ў межах праекту па будаўніцтве ў Беларусі пікава-рэзервовых крыніц ад кампаніі ў Міністэрства не паступала», – гаворыцца ў паведамленні міністэрства.
Прэсавая служба ведамства таксама паведамляе, што напярэдадні адбылася працоўная сустрэча з прадстаўнікамі кампаніі «Siemens». Бакі абмеркавалі рэалізацыю праекту, у тым і тэрміны паставак абсталявання.
Летась «Siemens Industrial Turbomachinery» выйграла тэндары на пастаўку абсталявання для будаўніцтва пікава-рэзервовых энергакрыніцаў на базе Бярозаўскай і Лукомльскай ГРЭС, Наваполацкай ЦЭЦ і менскай ЦЭЦ-5. Паводле ведамства, на ўсіх аб’ектах цяпер вядуцца будаўніча-мантажныя работы.
Каштарыс праекту складае каля 500 млн долараў ЗША.
Згодна з умовамі кантракту, беларускі бок унёс авансавыя плацяжы і частка абсталявання ўжо адгружаная. Мінэнерга таксама пагражае шведскай кампаніі, што ў выпадку зрыву кантракту прадугледжаныя штрафныя санкцыі.
СК belsat.eu
