«Баязлівец Лукашэнка канчаткова здаў Беларусь». Аляксандра Герасіменя запісала зварот пра пагрозу вайны
Вядомая беларуская спартоўка і алімпійская прызёрка Аляксандра Герасіменя звярнулася да ўсіх беларусаў, украінцаў і расейцаў з заклікам перадухіліць вайну. Яе відэазварот апублікаваў youtube-канал Беларускага фонду спартовай салідарнасці.
«Спорт заўсёды быў за мір. Захаванне міру і сяброўства паміж народамі – гэта наша галоўная алімпійская місія», – кажа ў звароце Аляксандра Герасіменя.
Спартоўка падкрэслівае, што на сёння самая сапраўдная пагроза свабодзе і міру на нашых землях – вялікая колькасць войскаў, сканцэнтраваная ў Беларусі каля межаў Украіны.
«Два састарэлыя дыктатары – Пуцін і Лукашэнка, дзеля ўтрымання аднаасобнай улады могуць у любы момант развязаць крывавую братазабойчую вайну супраць Украіны і ўкраінскага народу. Цяпер гэта самая галоўная небяспека для нас усіх», – кажа Герасіменя.
Яна адзначае, што фактычная акупацыя Беларусі ўжо адбылася.
«Суверэнітэт Беларусі ўжо страчаны, баязлівец і хлус Лукашэнка канчаткова здаў Беларусь. Мы, беларусы, павінны гэта сёння прызнаць і неадкладна распачаць кампанію ў абарону незалежнасці і міру», – гаворыць у відэазвароце Аляксандра Герасіменя.
Ад імя ўсіх беларускіх спартоўцаў і Фонду спартыўнай салідарнасці яна выказвае падтрымку ўкраінскаму народу і абвяшчае гатовасць зрабіць усё магчымае для абароны свабоды і незалежнасці Украіны.
«Сёння мы павінны перадухіліць вайну. Мы заклікаем усіх беларусаў, украінцаў, расіян аб’яднацца і не даць праліць нашу кроў дзеля геапалітычных амбіцыяў», – заклікала Аляксандра Герасіменя.
ЗК belsat.eu
