Палітвязень Валянцін Стэфановіч пераабраны віцэ-прэзідэнтам Міжнароднай федэрацыі за правы чалавека
Беларускі праваабаронца і палітвязень Валянцін Стэфановіч, які зараз знаходзяцца за кратамі, пераабраны віцэ-прэзідэнтам Міжнароднай федэрацыі правоў чалавека (FIDH) на 41-м кангрэсе арганізацыі, які праходзіць у Парыжы, паведамляе Праваабарончы цэнтр «Вясна».
Валянцін Стэфановіч змог накіраваць зварот кангрэсу праз краты. Яго зачытаў кіраўнік аддзелу Усходняй Еўропы і Цэнтральнай Азіі «FIDH» Ілля Нузаў.
«Хачу асабіста падзякаваць маім братам і сёстрам-праваабаронцам за іх салідарнасць і падтрымку ўсіх праваабаронцаў, пазбаўленых волі ў свеце, і, вядома ж, мяне асабіста. Салідарнасць у галіне правоў чалавека – гэта магутная сіла, і я веру, што неўзабаве я змагу разам з вамі прайсці гэты нялёгкі шлях да сусветнай гармоніі, кахання і свету», – цытуе «Вясна» зварот Стэфановіча.
Валянцін Стэфановіч – віцэ-прэзідэнт арганізацыі з 2019 года. Ён быў затрыманы ў ліпені 2021 года. Яго, як і іншых палітвязняў »Вясны«, вінавацяць у кантрабандзе – незаконным перамяшчэнні праз мытную мяжу Еўразійскага эканамічнага саюзу ў буйным памеры наяўных грашовых сродкаў, арганізаваным групаю, паводле ч. 4 арт. 228 КК. Таксама іх вінавацяць у фінансаванні групавых дзеянняў, што груба парушаюць грамадскі парадак (ч. 2 арт. 342 КК). Траім палітзняволеным вясноўцам – Алесю Бяляцкаму, Валянціну Стэфановічу і Уладзіміру Лабковічу – цяпер пагражае ад 7 да 12 гадоў няволі.
У кастрычніку Стэфановіч сустрэў свой 50-гадовы юбілей за кратамі.
Алена Рувіна belsat.eu
