Анджэй Пачобут ізноў не выйшаў на свабоду пасля заканчэння тэрміну ўтрымання пад вартаю
Палітычны вязень, журналіст і сябра Саюзу палякаў у Беларусі Анджэй Пачобут не выйшаў на свабоду пасля заканчэння тэрміну ўтрымання пад вартаю. Пра гэта паведаміла ягоная жонка Аксана Пачобут.
Пазаўчора, 25 ліпеня, скончылася папярэдняе падаўжэнне ўтрымання пад вартаю Анджэя Пачобута, але ён па-ранейшаму ў турме.
«Відавочна, мужу зноў працягнулі варту. Увесь гэты час ён жыве ў чатырох сценах. 16 месяцаў!!! За гэты час наш сын перагнаў па росце бабулю з дзядулем. З сынам не дазволеная перапіска, бо Андрэй з ягонага нараджэння размаўляе з ім на польскай мове. Ён піша скаргі, якія адміністрацыя нават не выпускае з СІЗА», – паведамляе Аксана.
Паводле жонкі, у лістах палітычны вязень піша, што не сумуе, чытае кнігі і гатовы да горшага развіцця падзеяў: «Перадае прывітанне ўсім знаёмым і незнаёмым асабіста людзям і дзякуе ўсім, хто, не гледзячы ні на што, працягвае пісаць».
За грамадска-палітычную і журналісцкую дзейнасць Анджэя Пачобута неаднаразова затрымлівалі, каралі штрафамі, арыштамі. Апошні раз журналіста затрымалі 25 сакавіка 2021 года ва ўласным доме ў Горадні пасля ператрусу. З таго часу застаецца ў зняволенні. Пачобута вінавацяць паводле арт. 130 КК РБ – «Распальванне варожасці». Ужо больш за год ён і затрыманая паводле той жа справы Анджэліка Борыс застаюцца сімваламі рэпрэсіяў супраць палякаў з боку беларускага рэжыму.
Алена Рувіна belsat.eu
