Калі вы не адразу пазнаеце, хто такая Таццяна Грыневіч, то дакладна ўзгадаеце, як на плошчы Незалежнасці цэлы месяц людзі збіраліся танчыць пад яе скрыпку і спяваць, ці як на маршах яна грала нашы ўлюбёныя песні 2020 года. А ці ведаеце вы, якую вялікую асветніцкую працу спадарыня Тацяна ладзіла да пратэстаў і працягвае цяпер?
Мы пагутарылі з Таццянай пра тое, што яна робіць цяпер, каб беларуская культура і мова працягвалі жыць, у тым ліку і за межамі Беларусі.
Цікаўнасць да беларускай мовы спадарыня Грыневіч адлічвае ад свайго 18-годдзя. Калі нарадзілася дзіця, Таццяна пастанавіла гадаваць яго па-беларуску і сутыкнулася з нястачай матэрыялу:
«Мы тады спеліся са Змітром Сідаровічам і давай рабіць песенькі для дзетак. Ёсць кніжка «Дзіцячы фальклор», і яе ніхто раней не пераспяваў. І мы ўзяліся за гэта», – узгадвае творца.
Першую частку закончылі ў 2010-м, потым была другая. Трэцяя частка пабачыла свет у 2020 годзе. «Не было навагодніх песенек – рабілі навагоднія, потым рабілі школьныя дапаможнікі. Я ўсё рабіла для дзіцяці, па ягоным узросце. Былі вершы, якія вучаць на памяць у школе, зрабілі такі ж дапаможнік з выразным чытаннем», – распавядае Таццяна.
Спадарыня перадала асобнік з вершамі «Няма прыгажэй ад маёй Беларусі» намесніку міністра адукацыі Віктару Якжыку. «Ён казаў, што класна, канечне, распаўсюдзім. А потым пераварочвае дыск, чытае, хто чытае вершы: Генадзь Бураўкін, Зінаіда Бандарэнка, Юрась Жыгамонт, Лявон Вольскі… І кажа: «Вы асветнікі, на вас трымаецца беларуская мова, а мы нічым не дапаможам», – узгадвае Таццяна.
Тады яна з паэтам і літаратуразнаўцам Міхасём Скоблам ездзілі па школах, ладзілі сустрэчы з вучнямі і настаўнікамі ls пакідалі гэтыя дыскі з дзіцячымі песнямі і вершамі. У адной школе яна даведалася, што настаўнікаў загружаюць так, што ім няма калі сачыць, што адбываецца тут і цяпер, сачыць за творчасцю ўсіх пісьменнікаў. А значыцца, трэба рабіць і дапаможнік аб сучасных паэтах.
Таццяна Грыневіч пачала запрашаць у студыю літаратараў і запісваць іхныя галасы. Так склалася, што запіс Генадзя Бураўкіна для гэтага праекту стаў апошні – праз пару месяцаў паэт захварэў і пайшоў з жыцця.
«Я зразумела, што толькі на сучасных спыняцца нельга, бо сёння мы – сучасныя, а заўтра – богавы. І я давай шукаць па архівах, з дыскаў, з касет, з вінілаў, збірала галасы. Сабрала ўрэшце 60 галасоў беларускіх паэтаў», – распавядае суразмоўца.
Гэтак жа Таццяна пачула, што не стае беларускіх рамансаў, і запісала іх: «Я знайшла працу Эльзы Зубковіч, якая эмігравала пасля вайны ў Амерыку, і тут зрабіла такі зборнік «Край мой васільковы». Я агучыла яго, і яшчэ на дыску некаторыя рамансы, якія знайшла», – падзялілася Грыневіч.
Агулам спадарыня Грыневіч зрабіла ці дапамагла запісаць і скласці 15 альбомаў.
Сяброўства з музычным інструментам, паводле якога цяпер часцяком пазнаюць Таццяну, пачалося з 2008 года: «Зміцер Сідаровіч мне тады казаў, што я буду ягонай скрыпачкай. І я пачала сама вучыцца граць на скрыпцы, праз 6 месяцаў мы забамбілі гурт – капэла «На таку». Гралі ў кавярні «Жар-птушка», у Ракаве, Барысе, Маладзечне, Баранавічах, у Музычным завулку ў Менску. Мы распаўсюджвалі народны танец, зацікаўлівалі ім людзей», – распавядае асветніца.
На 10-годдзе капэлы адбылася прэзентацыя дыску – дапаможнік па беларускіх народных танцах. Там ёсць навучальнае відэа з урокам, а пасля можна паставіць музыку і станцаваць. Раней дыскі з танцамі, вершамі ды іншыя дапаможнікі Грыневіч можна было набыць у галерэі «Ў» ды ў краме «Рагна». Каб пашырыць дасяжнасць, Таццяна пераносіць напрацаванае ў сеціва.
«Па меры з’яўлення дапаможнікаў я іх дадавала на флэшку і, ездзіўшы па школах, паўсюль іх пакідала. З некаторых школаў потым настаўнікі казалі, што развучылі танец з дзецьмі да мерапрыемства. Для мяне важна зацікавіць беларускай культурай дзяцей, настаўнікаў, каб яно жыло», – падкрэслівае Таццяна.
У 2016 годзе Таццяна Грыневіч пайшла з менскай філармоніі, бо ейная пазіцыя не адпавядала дзяржаўнай ідэалагічнай лініі. «Мяне ўсё вадзілі ў ідэалагічны аддзел, усё я іх не задавальняла. Раз ахоўнік прыйшоў і сказаў, што на гэтых трох канцэртах мяне не будзе, каб я ішла адтуль. Гэта былі ўрадавыя канцэрты для Лукашэнкі, Пуціна. Яны прысутнічалі на мерапрыемствах, і таму мяне там не мусіла быць», – узгадвае музыка.
Гэты ціск і самастойная канцэртная дзейнасць Таццяны былі не зручныя дырыжору, і з Грыневіч развіталіся. Але жанчына нядоўга заставалася без справы. Яна ўспрыняла сітуацыю як наканаванне:
«Я вельмі зайздросціла Язэпу Драздовічу, які апошнія гады вандраваў па Шаркаўшчыне. Прыйдзе ў хату, намалюе дыван, а рана раніцай ён ішоў далей. Мне хаджэнні па вёсках так падабаліся. І я паехала шляхам Язэпа Драздовіча».
Сваё падарожжа Грыневіч ладзіла на машыне і ездзіла ад гораду да гораду, ад школы да школы і па курсах «Мова нанова»:
«Я пачала з Глыбокага, Шаркаўшчыны, дзе Драздовіч хадзіў. Аб’ехала ўсе вобласці. З танцамі, са спевамі, з гульнямі, слухалі галасы паэтаў. У Горадні было, што я прыехала ў школу, а там настрой у настаўнікаў такі панікшы, усе такія стомленыя, нібы жыцця няма. А пасля нашай сустрэчы, пасля танцаў, песень яны былі як акрыленыя. Кажуць, што думалі, што ў Беларусі ўсё заглухла, і рукі апусціліся, а цяпер будзем далей працаваць. Было, што я перадавала сваё натхненне», – распавядае Таццяна.
Сваё выбітнае месца ў гісторыі пратэстаў Таццяна заняла не стыхійна, а свядома, пабачыўшы, што людзі не ведаюць, што рабіць: «Я пабачыла, што людзі збіраюцца, стаяць і нічога не адбываецца. Не было адчування беларускага руху на плошчы. І ў адзін дзень я ўзяла скрыпку, пайшла на плошчу і ціхенька пачала граць «Муры», і вакол мяне колам сталі людзі, узнялі сцягі і зрабілі нібы сцэну. І тры гадзіны я не магла сысці, грала, спявала, мы танчылі. Карацей, кожны дзень я хадзіла на плошчу Незалежнасці як на працу і па тры гадзіны мы спявалі-танчылі. Часам да мяне нехта далучаўся, і мы музіцыравалі».
Спачатку сустрэчы былі шматлюдныя, сілавікі не перашкаджалі людзям збірацца. А потым на плошчы пачаўся ціск. «Калі яны ўключалі гукаўзмацняльнік, я карысталася сітуацыяй: «О, гэта вальс, давайце танчыць вальс». Ці факстрот. Калі перапынак, пакуль яны мянялі касету, я спявала песню ці танчылі нашае. Калі з узмацняльніка пачалі казаць, што мы парушаем закон і пагражалі затрыманнямі, шмат хто палохаўся. Мне пасля жанчыны прызнаваліся, што так іх гэты ўзмацняльнік запалохваў, што яны думалі сыходзіць, бо псіхалагічна было вельмі складана.
А тут скрыпачка пачынае граць «Купалінку» ці галасок зацягвае, людзі падхопліваюць, пачынаюць танчыць і забываюцца на гэты страх, і застаемся на плошчы. Гэта мне казалі і сталыя жанчыны і маладзенькія дзяўчаткі. Мы трымаліся так месяц. Апошнія дні я баялася скрыпку браць з сабой. Мы з сынам дома запісалі музыку для танцаў, для гульняў. Проста з калоначкі маленькай уключалі і танчылі», – узгадвае тыя дні Таццяна.
Кадры разгону людзей на Плошчы Незалежнасці, калі сілавікі зачынілі дзверы касцёлу, абляцелі ўсе медыі. Таццяна была і ў той дзень на плошчы. Кажа, што ледзь не засталася без сваёй знакамітай скрыпкі. Пасля разгону плошчы Таццяна ладзіла выступы ў дварах. Сябра з Турэччыны настойваў, каб яна з’ехала з краіны, але тая марудзіла да апошняга, пакуль сілавікі ні пачалі хапаць музыкаў проста ў дварах: «Ужо быў набыты квіток, але я ўсё адно хадзіла на дваровыя канцэрты. Выпала і пабегаць. Трэба было так уцячы, каб не схапілі».
Маці Таццяны забраў ковід, не было магчымасці нават развітацца. Амаль год не бачыла сына: «Ён быў у Польшчы, у мяне была віза. То я паехала да яго, і адбылося маё турнэ па Польшчы, з той жа праграмай, што была на плошчы, з пратэснымі песнямі, з танцамі, з галасамі паэтаў, дзе хацелі. То я, як Драздовіч, па Беларусі ездзіла, а цяпер выйшла на міжнародны ўзровень».
Яна перакананая, што беларускую культуру можна захаваць па-за межамі Беларусі: «Адкуль прыйшла беларуская песня? Данчык (Багдан Андрусішын) нарадзіўся ў Нью-Ёрку і спяваў песні. І «Васілёк» прыехаў, паказваў народныя танцы. Яны неслі гэтую беларускую культуру, пакуль мы спалі. Атрымліваецца, на Беларусь прыйшла культура ў тым ліку і з Амерыкі. Таму пакуль беларусы ёсць і робяць культуру за мяжой, Беларусь жыве».
Цяпер спадарыня Грыневіч вандруе па ЗША, спявае і танчыць разам з тамтэйшымі беларусамі. Шмат хто прапаноўвае ёй застацца і чакаць перамогі ў Амерыцы, але Таццяна яшчэ не вызначылася.
«Калі я бачу нішу, я намагаюся яе заняць. Зараз такая ідэя – працягваць рабіць караоке, каб людзі вучыліся спяваць беларускія песні. Я нават навучылася гэта рабіць! Яшчэ адна ідэя – знаходзіць старыя песні і запісваць іх. Таксама будзе выкладзеная ў сеціва анталогія беларускай песні – адпаведны альбом. Як хутка, не ведаю. Спяшацца не трэба, бо сусвет лепей ведае, калі што мае саспець. Я спадзяюся на сусвет», – дзеліцца бліжэйшымі падзеямі наша суразмоўца.
Да ўсяго Таццяна працягвае весці свой канал, дзе можна знайсці песні на любы густ: ад дзіцячых, калядных і навагодніх да жаўнерскіх.
Марыя Мурашка belsat.eu