Расея не пакідае планаў захапіць Адэсу і Мікалаеў. Пра гэта ў эфіры «Студыі «Белсат» заявіў эксперт Цэнтру даследавання арміі Міхайла Самусь.
Часткаю гэтых планаў, паводле эксперта, ёсць эскалацыя сітуацыі ў Прыднястроўі:
«Як толькі Расея пачне наступ з Прыднястроўя на тэрыторыю Украіны, Украіна будзе мець права на самаабарону. І тады Украіна ўсё ж звернецца да кіраўніцтва Малдовы па дазвол праводзіць аперацыю на тэрыторыі Прыднястроўя».
Самусь адзначыў, што ў самым Прыднястроўі расейскіх войскаў няшмат, а ў збройных сілаў ПМР няма ані тэхнікі, ані досведу, дый маральны дух іх ніякі. Таму з Прыднястроўя пакуль не будзе актыўных вайсковых дзеянняў, а толькі спроба адцягнуць украінскія войскі ад Адэсы.
«Відавочна, што Расея не пакідае планаў ударыць па Мікалаеве і далей па Адэсе. Атачыць Адэсу і далей правесці марскую дэсантную аперацыю», – падкрэсліў Міхайла Самусь.
Прэзідэнт Украіны Уладзімір Зяленскі заявіў, што, нягледзячы на спробы Расеі дэстабілізаваць сітуацыю ў Прыднястроўі, Збройныя сілы Украіны гатовыя да магчымай эскалацыі з боку расейскіх войскаў.
Зяленскі падтрымаў ацэнку сітуацыі з боку прэзідэнта Малдовы Маі Санду, якая заявіла, што інцыдэнты ў Прыднястроўі маюць унутраны характар. Ён абмеркаваў гэтае пытанне з прэм’ер-міністрам Румыніі, які быў з візітам у Кіеве 26 красавіка.
ПС belsat.eu