Святлана Ціханоўская сустрэлася з кіраўнікамі місіяў АБСЕ Нямеччыны, Францыі, Вялікай Брытаніі, ЗША, Швецыі, Эстоніі, Літвы, Латвіі, Чэхіі і Польшчы. Экс-кандыдат на прэзідэнцтва распавяла пра палітычную сітуацыю ў Беларусі і прадставіла прапанову аб перамовах у краіне з мэтай вырашыць палітычны крызіс, паведамляе прэсавая служба Святланы Ціханоўскай.
Святлана Ціханоўская на сустрэчы з кіраўнікамі місіяў АБСЕ распавяла пра сітуацыю з палітвязнямі і катаваннямі ў Беларусі.
«Менавіта АБСЕ можа дапамагчы вырашыць крызіс у Беларусі мірна. Бо наша краіна – сябра гэтай арганізацыі, і ў АБСЕ дастаткова досведу і палітычнай волі, каб крызіс у Беларусі быў вырашаны», – адзначыла Святлана Ціханоўская.
На сустрэчы з Святланай Ціханоўскай былі кіраўнікі місіяў АБСЕ Нямеччыны, Францыі, Вялікай Брытаніі, ЗША, Швецыі, Эстоніі, Літвы, Латвіі, Чэхіі і Польшчы. Беларускі палітык падзякавала місіі за хуткую рэакцыю на галасаванне і падтрымку закліку да дыялогу. Таксама бакі абмеркавалі магчымыя фарматы медыяцыі і якія краіны могуць стаць пасярэднікамі ў вырашэнні крызісу.
Святлана Ціханоўская таксама папрасіла падтрымаць прапанову БДІПЧ АБСЕ па маніторынгу судоў. Яна заявіла, што незалежныя эксперты павінны прысутнічаць на судах, каб не дапускаць беззаконня.
СК belsat.eu