Служба вайсковай контрвыведкі Польшчы выявіла двух шпіёнаў, якія працавалі на Беларусь і Расею, паведамляе ўрадавы партал gov.pl. З пачатку вайны ва Украіне польскія спецслужбы затрымалі 20 асобаў, якіх западозрылі ў супрацы з расейскай ці беларускай выведкай.
21 сакавіка ў Польшчы затрымалі замежніка, які працаваў на расейскія спецслужбы. Яму ўжо выставілі абвінавачванне ды арыштавалі на тры месяцы. Польскія ўлады сцвярджаюць, што мужчына збіраў інфармацыю, сярод іншага, пра крытычную інфраструктуру ў Паморскім і Куяўска-Паморскім ваяводствах, а таксама пра дзейнасць службаў і органаў, адказных за бяспеку. Атрыманую інфармацыю мужчына перадаў расейцам.
Паводле Службы вайсковай контрвыведкі Польшчы, замежнік «прызнаўся ў здзейсненым злачынстве, распавёў падрабязнасці сваіх дзеянняў і акалічнасці вербавання расейскімі спецслужбамі». Мужчына шпіёніў як мінімум са студзеня 2023 года.
Акрамя таго, 1 сакавіка затрымалі падазраванага ў супрацы з беларускімі спецслужбамі. Яго таксама арыштавалі на тры месяцы.
Гэты замежнік, як сцвярджаюць, збіраў інфармацыю пра аб’екты, важныя для бяспекі Польшчы, у тым ліку звязаныя з Узброенымі сіламі.
З пачатку вайны ва Украіне польскія спецслужбы затрымалі 20 асобаў, якіх западозрылі ў супрацы з расейскай ці беларускай выведкамі, адзначаюць у паведамленні на ўрадавым партале gov.pl.
Раней зрабілася вядома пра затрыманне ў Польшчы дзевяці асобаў, якія, на думку польскіх спецслужбаў, збіралі інфармацыю пра пастаўкі зброі Украіне ды рыхтавалі дыверсіі на замову расейскай выведкі. У гэтай групе былі беларусы і ўкраінцы, пісала газета «Rzeczpospolita».
Сяргей Крот belsat.eu
